Sawrkar damdawi in tha thlan
zingah Mizoramin 14 nei tawh
Tehfung hrang hrang hmanga sawrkar damdawi in tha bik tehnaah Mizorama sawrkar damdawi in 14 an tel tawh a, endik hmabak 15 an awm mek.
India rama damdawi in tha leh rintlak hi National Quality Assurance Standards (NQAS) nei turin endik thin an ni a. Hetah hian primary health centre atanga Civil Hospital thlengin national certificate nei tur hian dilna an thlen thin. Mithiam bikten tehfung hrang hrang hmangin an endik a, chuta certificate hmu tlaka ngaihte hnenah NQAS hi pek thin a ni.
Tunhnaiah Mizorama sawrkar damdawi pali – Siaha District Hospital, Lawngtlai District Hospital, East Lungdar PHC leh Phuaibuang PHC hmu chuan national certificate hi an hmu a, a hniam ber Phuaibuang PHC hi 84.23% hmu in, Siaha District Hospital hi Mizoram atanga lang zinga hmu tha ber niin 92.53% a ni. Hemi hnu hian Khawhai Primary Health Centre pawh NQAS ah tling ve lehin, tehnaah 90.13% a hmu.
Heti hian Mizorama sawrkar damdawi in 14 chu NQAS national certificate nei an ni ta a. Tunah hian sawrkar damdawi in 15-in state level paltlang tawhin national certificate an dil mek a ni.
Mizoramah ‘damdawi in’ tia chhiar theih sawrkarin a neih dan chu – sub centre 379, primary health centre 61, urban primary health centre 9, community health centre 9 leh district/ civil hospital leh a tlukpui dang 15 a awm a ni.
Health & Family Welfare minister Lalrinpuii chuan, India rama damdawi in tha bik thlan chhuah zingah Mizorama damdawi in an awm belh zel chu state tan mellung pawimawh tak a ni tih a sawi a. Thawktu zawng zawngte thawhrimna leh taimakna chhuanawm a tih thu sawiin, heng tehna hi sawrkar damdawi in pantu damlote chu a chhawr tangkai bertu tur an ni tih a sawi.
Sawrkar damdawi in tha thlan zingah Mizoramin 14 nei tawh
