Sawrkar hmasa sum bat rulh zawh kan tum Sum chalai that lawmman kan dawng dawn – Chief minister

Sawrkar hmasa sum bat rulh zawh kan tum
Sum chalai that lawmman kan dawng dawn
– Chief minister
Kum 2018 atanga tlingkhawm sawrkar hmasa sum bat – commited liability an rul a, kum thum la awm chhung hian rulh zawh an tum dawn tih a sawi. Financial management-a tih that avangin lawmman an dawng dawn tih a sawi bawk.
Assembly Session-ah MNF member Robert Romawia Royte zawhna, tunhnaia chief minister-in sawrkar lo awm leh tur leiba hnutchhiah an tum ve loh thu a sawi thu sawiin, sawrkarin sum puk a uar hle chunga leiba nei loa insiam an tum dan a zawt.
Finance changtu chief minister Lalduhoma chuan, sawrkarin leiba hnutchhiah a tum lo tih chu, sum puk leiba (borrowing rulh bang – outstanding debt) sawina a ni loa, sawrkar leh turte rulh atana thil lo lei bat emaw sum awm siloa hna lo inthawhtir ve ringawt emaw avanga ba siamchawp (commited liabilities) sawina a ni tih a sawi.
“Heng leiba (commited liabilities) siamtu tam tak chu, budget provision awm si loa supply order issue, work order pekte a ni ber a; heng bi tun sawrkar chuan pumpelh a tum a ni,” a ti. Zawhna zawttu department chan thinah a tam zual tih chief minister hian a sawi a ni.
Leader of opposition Lalchhandama Ralte chuan, sawrkar hotuten sawrkar leiba chungchang an sawiah sawrkar hmasate nek rana sawi an ching tih a sawi a. Sawrkar hmasa sum ba ti kher loin ‘sawrkar leiba’ tih mai se, sawrkar hmasa lama sawrkar chelhtuten an sawi dan a ni ngai lo tih a sawi. Hei hi mawh la ngam lo sawrkar, ‘responsible government’ tih tur a ni em, tih a zawt a ni.
Chief minister chuan commited liability, kum 2018 atanga sawrkar hmasa bat tlingkhawm an rul a, chu chu sawi loh theih a ni lo tih a sawi. “PWD ah cheng nuai 1287 kan rulhsak tawh a, nuai 583 rulh hmabak kan la nei; PHE-ah nuai 4842 kan rulhsak tawh a, nuai 5801 kan la bak; P&E ah nuai 182 kan rulhsak a, nuai 1262 ala awm. Hetianga kan tih zel chuan kan hnunga sawrkar leh turten phurrit an phur zel dawn,” a ti.
Congress member C Ngunlianchunga chuan chief minister ‘rulh sak’ tih tawngkam a hmang chu a mawi lo a tih thu a sawi a, ‘sawrkarin kan rul’ ti mai se, tute nge a rulhsak chu, tiin a zawt a. Chief minister chuan MNF sawrkar sum bat an rulh sak miau tih a sawi nawn a ni.
Commited liability a awm tawh lohna turin Study Committee an din a, rawtna an siam tawh a. Hetiang leiba hi hnutchhiah ve loh hram an tum avangin a kalphung tih danglam an tum tih a sawi. “Heng (commited liability) hi Finance department tan a buaithlak em em a, sum kan han chhutin kan record-ah a awm si loa, kan hre tel tlat lo mai a, work order em pawh awm lo te a ni. Hetiang hi kan duh tawh loa, a kalphung siamthat kan tum,” a ti.
Finance changtu chief minister hian financial management-a an tih that avangin lawmman tam tawk an dawng dawn a, sawrkar kum kal mekah hmuh hman an inbeisei a, an hmu hman angem an hre lo tih a sawi.