By Dr J.T.Vanlalngheta
Vice Chiarman, Govt MZ Law College Alumni Association
Mizote hi hnam la upa lo tak leh sikul naupangte pawh hmathlir chungchanga la kaihhruai ngai tak kan ni, a bik takin, a mi nawlpuiin mobile/internet kan neih hma leh, kum 30 hma lamah khan. Hei vang hian 1990 hma lam te kha chuan HSLC exam form dah khah dawn khan a tlangpuiin kum ziah dan thuah zirtirtuten hmangaih takin an paupangte an kaihruai thin a. Mahni hmathlir (career) ruahman lawk thiam chu tlemte an nih avangin leh hna zawn chhung a rei thin avangin zirtirtute chuan hmangaih takin an naupangte chu inziak naupang turin thu rawn an pe ta thin a; hei hi naupangte kaihhruaina a nih avangin zirtirtute kha an fakawm a; kawng danga sawi chuan, an kum an ziah naupansak ti ila a dik zawk awm e; sawisel chiam chiam chi a ni lo va, kan sawisel leh thin hi a mawi chiah lo a ni. 1990 hnu vel atang erawh kha chuan pian veleha pian ni, thla leh kum chhinchhiah a nih avangin khatiang kha a tih theih tawh loh a, an lo ziah naupantir (-sak)te pawh kha Sawrkar hna thawk an nih chuan 2025/26 velah chuan an chawl zo vek tawhin a rinawm.
FMGE&W: Tunlai hian FMGE&W chuan khawvel ram dang thahnem taka an tih ang leh India rama post thenkhat luahtute angin, naupangten an nu leh pate thil an dil angin, Sawrkar hna thawkte chawlh (pension) kum, kum 62-a tih san turin State Sawrkar an ngen mek a. Hei hi a ti theitu chu Thu neitute an ni a, keini lo sawi ve chi emaw sawi theih emaw a ni lo va, A engti zawng pawhin thu tih tluk pawh lo ni se, nu leh paten tha tura an ngaih chu pawm thiamin sawrkar hna thawkte chu lung awi taka awm mai tur an ni.
Thil pakhat erawh chu—Federation meuhin a titlu tawh a nih chuan tho thil ang thapa awm mai tur an ni a. Vanglainiin mi tlem azawng an kawm khan anmahni awmna ngei Federation thu kalhin an sawi a, kha erawh kha chu Federation member tan chuan a zahthlak ngawt mai; an duh lo tak zet a nih chuan hetiang thu rel a nih lai khan sawi mai tur hi a ni a.
Sawrkar hna thawk thenkhatte hi chuan pension kum tih san hi an duh lo ni lovin, an pute kum 2-a an retire tlai tur hi an lo helh zawk niin sawi a awm ve bawk. Titi pakhatah chuan, College zirtirtute pension kum pawh hi 62 atanga 65 rawt a nih lai khan tu emaw pension har phah tur kha thenkhatin an lo buan lawk a, “Ani hi a chhuah (pension)hunah 65 chu kan nawr dawn nia,” ti an rawt a ni awm e. A pu chu a lo pension hnuah Sawrkar an han ngen leh a, a hma angin a thil a lo awlsam tawh si lo ni tur a ni.
Driver leh Group D-te pawh hi, a bikin matric hnuai lamte hi, thil hre zawkte thu rawn anga inziak naupang hi an ni nawk ang, sawisel lova, an service a rei thei zawk tur chu lawmpui hle zawk tur a ni. Mizo hnam thil (issue)-ah leh thil dang engah pawh ro rel thu tluknaah rinawm ila; khunkhan taka chhut lawk lova, a pawng apuia insawisel mai lovin Christian kan nih vek avangin Krista zuitu tih dan tur a nih leh nih loh hi insel hmain ngaihtuah hmasa thin ila Kristian nun dan mawi zawk a ni ang a, Mizo hnam din chhuah nana thil pawimawh tak a ni bawk awm e.