Sawrkar hnathawkten dearness allowance tipung tura state sawrkar thuneitute an nawrnaah 4% a tipung turin an inrem thei a, General Provident Fund-ah a lut thung ang.
Mizoram sawrkar hnathawk inzawmkhawm, Federation of Mizoram Government Employees & Workers (FMGE&W) chuan dearness allowance (DA) tipung tura sawrkar an nawrna a hlawhtlin hleihtheih loh avangin vawiin, August 28 atang hian na zawka sawrkar nawr relin an inruahman a, Inrinni khan finance changtu chief minister Zoramthanga hoin an thukhawm leh a ni. Hetah hian sawrkar dan dinglai anga DA tipung tura an ngenna chu chief minister hian sawrkar sum dinhmun harsa tak chungin 4% a tih pun a remtih sak a, kumin September 1 atangin an dawng tan dawn a ni. DA pung hi a sumfaia dawng loin an GP Fund-a thun tur a ni dawn a. A bak pawh sum dinhmun en chungin la sawiho zel nise, an ti.
Hetianga chief minister hnen atanga intiamna a awm tak avang hian FMGE&W chu Inrinni khan thukhawm ve leh nghalin, vawiin – August 28 atanga DA tih pun ngiata lungawilohna lantir an tumna hrang hrang chu an thulh ve nghal tih an puang a ni.
An lo ruahman lawk ang chuan, August 28 -30 chhung an hnathawhnaa kal tho chungin hna thawh loh an tum a, an la hlawhtlin loh zel chuan August 31 leh September 1 ah a huhoa chawlh lak an tum a ni.
Sawrkar hnathawk DA 4% GPF-a thun turin inrem
