Right to Information Act 2005 leh Mizoram RTI Rules 2010 chungchang hriat tur tul inhrilhin, Mizoram State Information Commission hotute an fehchhuak a. Thawhtanni khan Saitualah leh Thawhlehni khan Khawzawlah chief information commissioner John Neihlaia hoin an district-a sawrkar department hrang hranga RTI pekchhuah lama mawhphurtute leh khawtlang hruaitute kohkhawm an ni.
CIC chuan sawrkar hnathawkten RTI chu hna pawimawh bera an ngaih loh thin vangin a pek chhuah kawngah an khaihlak thin tih a sawi a. Sawrkar hnathawkte chu mipui chhiahhlawh angin insawi thin mah se, an rilru ah an inpawm theih tak tak thin loh avangin mipui nen an inkarah langtlang lo tam tak a awm phah thin tih a sawi.
VC-te pawh an hnathawh mipuiin an zawhna leh an hnathawh dan an hriat duh te LAD ah emaw a department concern-ah zawt kher loin, anmahni chu a chhangtu – SPIO a ruat an ni a, RTI chu mipui tan a inchhawp hnai tih sawiin, “Heng zawng zawng avang hian RTI tihlawhtling tur chuan kan za in mawhphurhna kan nei a ni,” John Neihlaia hian a ti.
Saitual bawrhsap Dr Lalngura Tlau pawhin sawrkar department thenkhatah RTI-a mahni nihna pawh la hrechiang lo an awm chu pawi a tih thu sawiin, RTI chu India danpui – Fundamental Right-a rin luh tawh, pawimawh tawpkhawk a ni, tiin a sawi.a ti a. RTI pek chhuah chu sawrkar hnathawkte tan thil pawi a nih loh laiin, tikhawtlai an awm thin chu hriatthiam har a tih thu a sawi bawk.
Khawzawla inzirtirnaah MSIC secretary H Dolianbuaia chuan RTI chu sawrkar tha, sawrkar dik, langtlang sawrkar siam tura hmanraw pawimawh ber a ni, tiin, RTI atanga hmuh chhuah pawimawh tak tak a awm tih a sawi. “Politician-ten ram an tih chhiatna tur vengtu tangkai tak a ni. Mizorama thil dik lo sawrkarin a tih tam tak kan chinchhuah hi RTI hmanga dil deuh vek a ni,” a ti.
Sawrkar hnathawk leh khawtlang hruaitute hnenah RTI dan hrilhhria
