Mizoram sawrkar hnuaia hnathawkte chuan dearness allowance rate an hman tur sawrkarin hriattirna a chhuah tawh anga hman phutin an hnathawhna hmunah badge dum an bel. Vawiin – August 18-ah pawh an bel chhunzawm ang.
State sawrkar hnuaia thawkte inzawmkhawmna, Federation of Mizoram Govt. Employees & Workers (FMGE&W) chuan Pay Commission hnuhung berin DA rate an hman tur a lo ruahman tawh, sawrkara an lo dil fo tawh leh, sawrkarin hriattirna siama rate thar ang hman tura a lo tih tawh chu tun thlenga an la hman loh avangin sawrkar chu hmantir turin an ngen leh tawh a; DA chungchang sawipui tura chief minister an ngenna in awmzia a neih theih loh avangin, an lungawiloh lantirna’n leh sawrkar hriattirna tihchhuah tawh anga DA rate thar hman phutin August 17 & 18 a badge dum bel an lo rel tawh a ni.
FMGE&W hruaitute atanga The Aizawl Post thudawn danin, lungawiloh an lantir hnu ah sawrkar hotute atangin thudawn thar an nei loa; August 16 khan sawrkar sum dinhmun harsat avanga DA rate thar anga kalpui thei an la nih loh thu leh, lungawiloh lantir tum rih lo tura ngenna an hmu a; an kaltlangpui ta tho a ni. Sawrkarin an thil phut hi a tihhlawhtlin loh chuan, pawlin a lo rel tawh angin August 22 hian an kal zel dan tur chu FMGE&W General Council thukhawmin a ngaihtuah dawn a ni.
Sawrkar hnathawkin badge dum an bel
