‘Service association hrang hrangin min rawn hmu thin a, ram tana tha tur rawn sawi an vâng hle. An pawl tan, an hamthatna atan thu an rawn keng deuh zel’ tiin chief minister chuan tun hnaia sawrkar hnuaia thawk daktawrte inkhawmpui a hmanpuinaah a sawi a. Service association thenkhat chuan ‘pressure group’ emaw an inti em aw tih theihin an kal, a ti bawk.
‘Government Servant’ hi ‘sawrkar hnathawk’ tia sawi thin a ni a. JF-a dictionary-ah chuan servant hi ‘chhiahhlawh’ tih a ni tawp mai a, sawifiahna dang a awm lo. Saptawnga servant awmzia hrilhfiahna chu “a person who performs duties for others, especially a person employed in a house on domestic duties or as a personal attendant” tih a ni a, servant awmzia chu ‘tirhkah’ tih nen pawh a inzul viau awm e.
Sawrkar hnathawkte hi mipui rawngbawltute an ni a, mipui mamawh leh hamthatna tura thawk tur an ni a. An thiamna leh finna mila hna hrang hrang dinhmun chelha, an hna chelh hniam leh san dan azir zela hlawh pawh pek an ni.
Entirnan: Chhungkaw ropui tak pakhat chuan an in enkawl tur leh an mamawh apiang tihsak turin chhiahhlawh tam tak a ruai a. Chhiahhlawhte chuan a ruaitute chenna in tuaihnum emaw, huan pangpar leh thlai enkawl hna emaw, leh thildangte pawh, ngaihsak tha si lovin an hlawh pun tur te, anmahni hamthatna tur ngaihtuah ringawtin in neitute kar fo mai se, chu chu chhiahhlawh dinhmuna dingte tihawm tur a ni em? tih zawhna a lo piang ngei ang. Sawrkar hnathawkte leh tuna entirna ‘chhiahhlawh’ te hi dinhmun inang an ni e tihna a ni hran lo va, chhiahhlawh dinhmun sawifiahna mai a ni.
Sawrkar hnuaia department hrang hrangte hi a department kaihhnawih hmasawnna hna thawk tura din a ni vek a. Agriculture department hi entirnan han thur chhuak ila: An enkawl tur chu thlai hrang hrang chinga kuthnathawktute dawmkan a, kuthnathawktute thawh chhuah tih pun a, chu chu ram economy chawikangtu ni thei tura hmalak a ni. Agriculture department hian kuthnathawktute chu a enkawl ngei mai, mahse ram hriatute ngei ngei pawhin, ‘thla hnih khat tla bak kan tharchhuak lo’ tih bak hmasawnna thar hi sawi tur an nei tam ngai lo. Kum tin ramngaw thiatin buh kan ching tlut tlut a, a lehlamah supply buhfai quota kiam khawpin buh kan tharchhuak ngai si lo. Hetiang hian education, health etc. te hi han thlir ila, ram tana tha tur rawtna hi ram hruaitute hnenah eng angin nge an lo thlen thin tih hi kan sawrkar hnathawkte hian inenfiah nan hmang ve thin se, tun ai hian hma kan sawn phah ngei ang.
Sawrkar hnathawkte hi…
