State-a sawrkar lai auhla leh hmachhawp pawmtu MP atana thlantlin chu kan state tan thil tha ber a ni tih ZPM hruaitu, minister B Lalchhanzova chuan a sawi.
ZPM star campaigner B Lalchhanzova chuan, ZPM-in Zoram tana an hmachhawp an tum anga a hlawhtlin theih nan Lok Sabha member atan Pu Richard Vanlahmangaiha an candidate a, Zoram mipui puihna an ngen tih a sawi.
Mipui rilru sukthlek enin Aizawl mai ni lo, hmun hla zawk lamah ZPM laka beiseina mei a alh chho zel tih a hriat thu leh minority pawhin ZPM chu belh tlakah an ngai tan tih a hriat tak thu a sawi a. ZPM-in sawrkar a siam atang khan tha thlah loin, hna an thawk mawlh mawlh a, mipuiin an rin ngam ang ngeia an mawhphurhna hlenchhuah an tum a, mipui tan biak nuam leh inhawng turin hma an la a, ZPM minister-te chu biak an nuam, an induh lo, tih te an hlawh mek nia an hriat thu a sawi a ni.
Ram sum dinhmun siamtha turin finance changtu chief minister-in theihtawp a chhuah nia sawiin, “Sawrkar bill ba pek chhoh mek niin, electric chhit man ba leh health care bill tang pek tlak, kum upate pension atan ruahmanna siam, police TA/DA leh MR bill sawrkar hmasa atanga tang tawh pek fel vek a ni a. Pension lak mai theih loh thin leh GP fund lak harsa lutuk thin pawh a fel chho hret hret ang,” minister hian a ti.
Ram siamtha turin kum 5 a tawi lutuk nia mipui zirtir thinte nen chuan an danglam hle tih a lanchian thu a sawi a ni.
MP inthlanah ruling party-ten an party candidate chu sawrkar thawhpui theih candidate, tiin an zuar thin a, ZPM chuan an MP candidate chu ZPM auhla tuipuitu, chief minister Pu Lalduhoma kutke ni thei tur, tiin an zuar mek a; chumi thlantlin chu kan state tan a tha ber ang tih chu pawm dan tlanglawn ber nia a lan thu ZPM star campaigner hian a sawi bawk.
Recognised party zinga central-a zawm nei ve lo party awmchhun chu ZPM party chiah an ni, tiin, “MNF chu BJP nen tanghoin NDA-ah fehkawng khat an zawh ho a. ZPM MP candidate chu huaisen takin national party liante thuhnuaia kun loin, ram tan Parliament ah a tih tur a ti mai dawn. Tualto party-te hian Delhi tlangah khuan zawmpui zuk neih kher a tul loa, tha taka state sawrkarin hna a thawh chuan central sawrkar hi a thil phal em em a ni,” B Lalchhanzova hian a ti.
Sawrkar lai hmachhawp pawmtu thlantlin hi state tan a tha ber ang – B Lalchhanzova
