Sawrkarin an chunga ro a rel dana lungawilo governtment adhoc aided high school zirtirtute chuan Nilaini khan Aizawlah lungawiloh lantira pungkhawmin sawrkar lehkha pathum copy an hal.
Mizoram Govt. Adhoc-Aided High School Teachers’ Association (MIGAHTA) chuan sawrkarin provincialise-a a hlankai tawh a sut leh avangin hun engemawti lai atang khan phut neiin sawrkar an lo nawr tawh a, tunhnaiah ni 5 chhung vel hemi vang bawk hian lungawilohna chi hrang hrang – badge dum bel, zirtir loa school kal leh a huhoin casual leave an lo la tawh a ni.
Sawrkar hotute lamin an thil phut tih hlawhtlin tumna an nei lo nia hria in, Nilaini khan Aizawlah ‘Peaceful Sit-in Demonstration’ an nei zui a, Mizoram hmun hrang hrang atangin MIGAHTA member an kalkhawm.
Pungkhawm auhla zingah, Mizoram sawrkarin an chanvo neih tawh – provincialise an nihna a laklet chu pe leh tura ngenna, sawrkarin lump sum grant in aid rules hman tir a tum chu school kalzelna atan him lo an tih thu, Mizoram Education Rules 2026 cancel leh tura ngenna, sawrkarin ‘power to relax’ a hman chu khairual taka hmang tura phutna te a tel.
Sawrkarin 2024 June 18-a provincialise atanga an paihthlak lehna order, 2026 May 18-a school 34 bik provincialise an nihna notification leh, kum 20 liamtaa an kal pelh tawh grant -in- aid a namthlak an tum lehna Lumpsum Rules thar kumin July 21-a a tihchhuah chu an duh lo tih lantirna atan a copy an hal bawk.
Hetihlai hian Mizo Zirlai Pawl chuan sawrkar leh MIGAHTA inkarah hian palai hna a thawk mek a. Nilaini tlai khan School Education minister Dr Vanlalthlana chu MZP Pisapuiah lengin MIGAHTA thil ngiat leh an nawrhna chungchang an sawipui.
Hemi chungchangah tho hian adviser to CM (Political) Lalmuanpuia Punte MLA hoin MIGAHTA leh MZP hruaitute an thukhawm a. An harsatna tawh leh an thil phut hi sawiho a ni.
‘School provincialise tura nawrhna hian zirlaite zirnaah nghawng tha lo a neih theih avangin MZP chuan a ngai thutak hle a. Zirlaite hmakhua hriltu leh zirlaite khawih thil a nih avangin palai hna kan thawk a ni. MIGAHTA leh sawrkar lam an inbiak fel thuai kan beisei a ni,’ MZP thuchhuak chuan a ti.
Sawrkar laka lungawilo zirtirtu pungkhawm
