Environment kaihhnawih programme-ah khuallian atana ram hruaitute hman an nih hian, environment humhalh a pawimawhzia te, thingtlang loneih (shifting cultivation) avanga ramngaw a chereu chak thu te, ramngaw chereu zel tur dan nan kum tina ramngaw thiat zawnga eizawnna thingtlang loneih thlakna tur policy (Garden Colony, Land Use Policy, Jhum Control, NLUP, MIP, SEDP etc) sawrkarin a kalpui thute ngaihthlak a ni thin.
Sawrkar policy-te hi a nihna tur anga kalpui a nih chuan thil tha tak tak vek a ni; mahse, a policy/scheme hlawhtlinna tura tihtakzeta kalpui a nih thin loh (election oriented?) avangin, tun thleng hian heng policy tha tak tak avanga lang tham khawpa state-in hma a sawnna hi hmuh tur a la awm hran lo. Tute emaw thahnemngai fal deuh lo hlawhtlinpui tawkte chu an awm ang; mahse, a state pum huap anga hmel danglamna khawpa sawrkar policy te kalpui theih hi a la awm lo tiin a sawi theih awm e.
MZU-a environment lam mithiam pakhat chuan, heng land use based economic policy-te hian a chhe zawngin nghawng tha lo a hringchhuak tih sawiin, chungte chu – vantlang ram a tlem tual tual a, vantlang ramte hi mimal ramah a lo chang zel, tiin a sawi. Hei hi thil dik tak niin a lang. Sawrkarin a policy behchhanin beneficiary-te tan ram a theh a, chung ramte chu beneficiary-te chuan an han enkawl a, a hnuah mahni ram anga cheibawl chhunzawmin, a tawpah chuan mi hausate hnenah an hralh leh a, sum ngah mihausate ramah a lo chang ta zel mai a ni.
Sawrkar hian hmasawnna tura ngaihtuahna a sen hian, ram hnuk khawih thil a nih thin avangin a thatna leh that lohnate ngunthluk taka buk tawn chunga ngaihtuah a pawimawh hle. Tuna Four Lane kawngpui sial tur pawh hi, ASEP lam chuan an welcome lo hle a, hei hi sawrkara thuneitute pawh hian kan state dinhmun nena inmil tawk tur leh hun lo la awm zel tur kum za tam tak thlir chunga thutlukna a siam thin a pawimawh dawn hle. Mi ram, mi state pawhin an nei alawm tih vanga a nghawng tha lo awm thei turte ngaihtuah lek lova kalpui nghal ngawt zel lovin, ngunthluk taka ngaihtuahna sen a tul niin a lang.
Global Forest Watch-in a tarlan dan chuan, 2001-2023 chhunga India-in ramngaw a hloh zawng zawng 60% chu state panga – Assam, Mizoram, Arunachal Pradesh, Nagaland leh Manipur te thawh a ni a; Mizoram chuan thawh sang berin India-in ramngaw a hloh atanga 13% zet chu Mizoram thawh a ni. Ramngaw nei tha ber kha, a lehlamah chuan, ramngaw hloh tha ber kan ni leh lawi si a ni.
Heng atang pawh hian environment nena inbuk tawk tha tura hmasawnna hnathawh turte pawh hi kan buk kual thin a pawimawh hle tih a lang reng a ni.
Sawrkar leh environment humhalh
