Mizote chu hnam intodelh, mi pur hreh ni thin mah ila, hun engemawti atang khan sawrkar a innghat tlat, MLA/minister tea innghhah tlat kan awm ta tih Cooperation minister PC Vanlalruata chuan a sawi a. Mahni kutkea ding theia rilru siam a tul tih a sawi.
Mizoram Cooperative Apex Bank Ltd. in Nilainia Aizawla annual general assembly vawi 29-na an neih a hmanpuinaah Cooperation minister chuan sawrkar emaw minister/MLA a innghah tumna chu paih a, mahni kea ding theia ngaihtuahna siam a pawimawh tih a sawi a. Society leh mimal in hma an laknaah hlawhtling tak tak tur chuan a tlem thei ang bera sawrkara innghat a, mahni mimal theihnaa ding a, hma sawn tum turin a sawm.
Tunhnai kum reilote chhunga Mizoram Cooperative Apex Bank-in a sum vawn leh peipun kawnga hmasawnna a hmuh zel avang leh, mi engemawzat tan eizawnna a siam chu chhuanawm a tih thu a sawi a. Cooperative bank-te bul tanna, primary cooperative society chu an hmakhua ngai a, an hmasawnna atan hma la zel turin a chah. Sawrkarin Bana Kaih Policy a kalpui turah cooperative society tihchangtlun a, a awmlohnaa din a, zirtirna kalpuia hma la turin an inpuahchah mek tih a sawi bawk.
MCAB inkhawmpuiah hian cooperative society thawk thate hnenah leh branch thawk tha te hnenah lawmman hlan a ni a. Shareholder-te hnenah share dividend (an bank account-ah) pek an ni.
MCAB hnuaiah hian branch 27 a awm a. ATM 34 (mobile ATM telin) an nei mek. A vaiin thawktu 165 an awm a ni.
Sawrkar leh minister tea innghat tlat kan awm ta – Cooperation minister
