Sawrkar lehkha hoah Aizawl atanga
Thenzawla capital sawn tumna hlir
– Lalchhandama Ralte
Lehkhaa Mizoram sawrkar leh sawrkar laipui an indawr tawnnaah Aizawl atanga Thenzawl-a state capital sawnna tur ang hlirin ziah leh sawi a ni tih MNF MLA Lalchhandama Ralte chuan a sawi.
Ningania Assembly Session-ah leader of opposition Lalchhandama Ralte chuan, 2024 January 17-a chief minister-in Prime minister hnena DO letter a thawnah Aizawl khawpui a tawt tawh lutuk avang leh hmunhma din belh zel tura harsatna a awm avangin, he harsatna pumpelhna atan leh a hmunhma in a zir avangin Thenzawl chu capital city thar atan mi nuai 10 tal chen theihna tura ruahman nise, tiin a ziak tih a sawi.
Hemi dungzui hian Delhi Mizoram House residential commissioner Garima Gupta chuan 2025 March 18 khan Ministry of Urban Housing addl secretary hnenah Aizawl atanga Thenzawl-a state capital sawnna atana DPR siamna tur fund pechhuak tura ngenna a ziak a. 2025 April 24-ah sawrkar laipuia AMRUT hotu atangin Delhi Mizoram House RC hnenah hian, hemi thupui tho hmang hian DPR siamna tur sum an pekchhuah thu a thawn leh tih a saw. Delhi Mizoram House RC hian Mizoram chief secretary hnenah state capital sawnna tur sum centre-in an pekchhuah thu hi lehkha in a rawn hrilh tih a sawi bawk.
Sawrkar laipui lam tihsuala puh dawnin, Mizoram sawrkara UD&PA under secretary-in director hnena DPR siamna atan sum an hmuh thu a thlenah pawh heti tho hian a thlen tih leader of opposition hian a sawi. “Chutiang a awm tawh hnu chuan UD&PA-in ‘press note’ siamin, ‘Mizoram state capital sawnna tur project ni awma tunhnaia sawi awm chu, sawrkar laipui atanga lehkha lokala ziah sual palh vang a ni,’ tiin an sawi a. A bul tanna chu chief minister DO letter thu kal zel kha a ni,” a ti.
Hemi chhangtu UD&PA minister K Sapdanga chuan, he thu hi thil thar ni lo, sawichhuah tawh thin a ni, tiin, official lehkha lo dawngsawngtu sawrkar laipui lam mi lo hriat dan leh ngaihdanah Aizawl atanga Thenzawla capital sawn tur ang riaka ngaihna an lo nei lian hle nia a lan thu a sawi a. A sawichhuaktu pawh officer zingah a chinchang hre lutuk lo, state pawn atanga rawn kalte an ni hlawm tih sawiin, DO letter-a a inziah dan chungchang chu chief minister-in a sawifiah theih a ring tih a sawi a ni.
Aizawl khawpui tawt lutuk tih ziaawmna atan Thenzawlah khawpui thar ‘Peace City’ din ila, tih chu chief minister-in a sawi thin an hriat dan a ni tih a sawi bawk.
Sawrkar lehkha hoah Aizawl atanga Thenzawla capital sawn tumna hlir – Lalchhandama Ralte
