Sawrkar mekten state mamawh tak tak chu sawrkar tawhte ang thoin an la rawn hawn thei bik lo tih BJP Mizoram president Vanlalhmuaka chuan a sawi.
An party office-a thu a sawinaah BJP Mizoram State president chuan Mizorama sawrkarna chelh tawh leh chelh mek chief minister leh minister-te central-ah an kal ve zauh zauh a, thil tak tak an la rawn hawn awm hriat a ni loa, an thusawi tam tak pawh an kal nawn leh chuan an rawn thak leh thin tih sawiin, “Sawrkar mek hian state mamawh tak tak hi sawrkar tawhte ang tho khan an la rawn hawn thei bik lo niin a lang,” a ti.
Mizoram chu tuihna awmlohna lam hlirah kan tlan a, state dang chuan tuihna awmna lam an hria a, an state-ah nasa takin development a thleng zut zut niin Vanlalhmuaka hian a sawi. “BJP Mizoram-in 2023 MLA inthlana manifesto kan neih kha kan auhla a la ni reng a, central BJP nena kan duan ho a nih avangin kan manifesto hmang hian Mizoram mipui mamawh sector hrang hranga central-in sum min dahsak chu BJP kaltlang chuan tihhlawhtlin har lo a ni a, nimahse, kan thuziak ang chiah pawh party dang tan chuan tih theih a ni chuang lo,” a ti.
BJP pawimawhna kan hriat hun hunah development kan beisei chu kan hmu dawn tih a sawi a ni.
Sawrkar mekten engmah rawn hawn thei bik lo – MBJP president
