Sawrkar nawr mekte kaltlang tum

Sawrkar hotute atanga hna an zawm loh chuan bana vau thawm a awm mek laiin CSS hnuaia thawktuten sawrkara thil an phut chu nawr chhunzawm zel an tum.
All Mizoram CSS Employees Coordination Committee chuan sawrkara an thil nawr mek tih hlawhtlin phutna atan September 16 atanga sit-in demonstration neih an tum chu kaltlangpui an tum a, Aizawlah chuan MINECO-a open gym bulah chawhma dar 10.30 atanga neih an tum. Aizawl leh a chhehvela awmte chu kim taka kal turin an inhriattir a ni.
Aizawl pawn, sub headquarters zawng zawngah pawh sit in demonstration hi nei vek turin an inhriattir a. Sub Hqrs. a kalkhawm remchang lo a awm theih avangin, hetiang an awm a nih chuan Sub Hqrs. remtihna leh berawn chungin block/ village level-a nei turin an inhriattir.
Sit-in demonstration neih ni atan bik mahni thawhna department-ah theuh casual leave la a, kal vek turin an inchah a. Tharum thawhna lam hawi reng reng lantir lo turin an inhriattir lawk a ni.
An nawrh chhan pakhat, DP&AR minister hnena kumin May 19-a representation an thehluh, a chin hriat zui ta lo chu member zawng zawng tan PDF file-a dahchhuaka member-ten lo chhiar theuh turin an inchah a.
Sit-in demonstration an neih hian awmzia a nei lo a nih chuan tiamchin awm loa nawrh chhunzawm an tum tih an sawi a ni.