Nimin khan fisheries department leh central YMA ten luidung humhalh tura thawhhona thuthlung an ziak a. Fisheries department leh central YMA hian kum 2021 atang khan thawhhona thuthlung hi kum hnih atan zel an lo ziak tawh thin a, tunah hian a tum thumna atan thawhhona thuthlung hi an ziak leh a ni.
Pawl hrang hrang leh sawrkar hnuaia department hrang hrangte hian thawhhona tha tak an nei thin a, hetianga sawrkar leh pawl thawhhona ang hi state dangah hian a awm ve a nih pawhin Mizoram hi chu a chungnung larhin a rinawm.
A nih leh, eng vanga sawrkar leh pawl hrang hrangte chu thawh ho ngai ta nge? tih hi zawhna awm thei a ni. Sawrkar hnuaia department-te hian department awm chhan – ‘an hna chanpual leh mawhphurhna an hlen chhuak zo lo’ tihna em ni ang?
PWD leh YMA thawh ho a ngaih chhan chu, contractor-ten a nihna tur angin hna an thawk tha lo thin a, kawngpui a tha rei lova, kawngpui chhia chu mipuiin an tuar a, ram hmasawnna tur a dal a, chuvangin contractor-ten hna tha taka an thawh theih nan YMA-in an vilpui a lo ngai ta tihna a ni. YMA-in hna an vil ngun poh leh hna a tha chho ve ta mai niawm tak a ni.
PWD mawhphurhna chu, ‘kawngpui siam laiin contractor-ten hna an thawk dikin a nihna tur angin hna a tha em tih ngun taka vil’ a ni; mahse, hei hi an tlin loh avangin YMA hi phungbawmah an sawm ta mai nge, YMA lam hian ‘kan lo vilpui ang che u’ an ti zawk? A enga pawh chu ni se, thawhhona a awm hi a lawmawm hrim hrim.
Hetiang bawk hian department hrang hrangah pawh, entir nan, education lamah te, forest lam te, etc.. thawhhona hrang hrang awm thin hi department-in an hna chanpual leh mawhphurhnate a nihna tur anga an hlenchhuah zawh that tawk chiah loh vang a ni thei a, a aia tha zawk duh vang pawh a ni thei bawk.
A enga pawh chu lo ni se, mipui hian sawrkar hi kan hmu hrang lutuk tur a ni lova, sawrkar pawhin mipui lam hi an hmu hrang lutuk tur a ni lo. A nihna takah chuan ram leh hnam tana thawk ho a, chumi thawhhona rah chu seng tlang vek tur kan ni a, mi tin hian ‘ka ram leh hnam tan eng nge ka tih ve theih’ tih rilru kan put tlat chuan, chumi infawk khawm chuan hmasawnna tha tak a chhuah ang a, chu chu kan chang tlang leh vek dawn a ni.
Chutih rualin, sawrkar department ten an hna an tlin loh vang hrim hrima thawhhona hi neih tul thin a nih erawh chuan, department lam intuaithar a ngai tihna a ni. Intuai thar tum lo, pawl thachaknaa innghah tum sawrkar department kan nei teuh mai ang ang tih erawh a hlauhawm thei awm e.
Sawrkar nena thawhhona
