Govt Complex ni thin, Ainawn Veng tih taka sawrkar building ho chu a chhiat tawh avangin a tahtawla thiah tum a ni tih chief minister Zoramthanga chuan a sawi a. Helai hmuna awmhmun bengbel nghet tawh leh ram neite chu LSC pek mai turin sawrkarin a ngaihtuah mek tih a sawi bawk.
General Adminstration changtu chief minister hian Assembly Session-a zawhna chhangin, Ainawn Vengah hian sawrkar building 47 a awm a, heng building-ah hian quarters 184 a awm. Quarter-te hi upa tawh tak an nih hlawm avangin a him tawh loa, a chhunga chengte bakah a bulhnaia chengte tan a him tawh loa, chhiatna engemaw lo thleng se, mi nunna thila mawh phurh theihna a nih tawh avangin thiah vek turin hma lak mek a ni a, sakthat emaw repair emaw pawh tih zui a ni tawh rih lo, a ti.
Sakthat tur ni dawn se, a luah mektute awm lailawkna tur hmun a awm mai si loa, humanitarian point thlir telin, a tahtawla thiah leh sak that dan theih dan en tum a ni tih a sawi.
Ainawn Veng bakah Bawngkawn Brigade hmuna inbengbel nghet tawh te chu LSC pek fel law law mai nise, tih chu sawrkar hmasa hunah pawh an lo ngaihtuah dan a nih avangin, tun sawrkar pawhin hetiang ngaihdan hi a nei a. Tun term chhungin LSC nei thei turte chu tihfel hman tum a ni tih a sawi.
Sawrkar quarters thiah tum
![](https://theaizawlpost.org/wp-content/uploads/tap_logo-min-large.jpg)