School Education minister Lalchhandama Ralte chuan sawrkar laipuia Ministry of Education thuneitute a dawr a, sawrkar laipui scheme hnuaia Mizoram zirna atana thil tulte a thlen bakah tunhnaia cabinet-in sawrkar school-a a hlankaite tan grant an dawn theih angte a dilsak nghal.
Ministry of Education additional secretary Vipin Kumar leh joint secretary Prachi Pandey te a dawr a. Tunhnaia adhoc aided school atanga sawrkar school-a hlankai tharte chu minister ngenna angin, school dinhmun chhinchhiahna UDISE-ah siamthat an lo phalsak.
Hemi behchhan hian hlankai tharte tan sawrkar school-in an dawn thin a thlawna sem uniform grant, text book leh composite grant te pek ve nghal a thuphungin an lo remti. Mizoram sawrkarin adhoc aided atanga sawrkar school-a hlankaite hi hriattirna a tihchhuah hunah an chanvo tur hi dil an lo phalsak a, kumthar annual plan siamah dinhmun thara hlankai school 180 ten an hlawkpui dawn a ni.
Samagra Shiksha leh PM Poshan scheme hnuaia ministry-in Mizoram tana sum a la pek chhuah loh te chu a rang lama pe turin a ngen. Ministry hotute hian tunkar hian pek theih an beisei thu an hrilh.
Hindi zirtirtu 855 awm mek, Ministry of Education-in 812-a a tihtlem chu a ngai anga tipung leh turin a ngen a. Ministry hotute hian ziaka thehlut tura chahin, lo ngaihtuah an tum thu in an chhang.
Sawrkar school-a hlankai tharte tan grant dilsak
