Mizoramah sawrkar school a tha tia au thinte chuan a hmun ngeiah zirchiang se an duh hle tih AAP Mizoram chuan an sawi.
Thingtlang khaw hrang hrang an tlawhnaah, an harsatna leh mipuiin sawrkar leh MLA-te an beisei dan an hmuh bakah an khaw dinhmun an hmuhpui tih AAP Mizoram hian sawiin, zirna in beisei a phak loh mek laiin, thingtlang lamah a chhe zual tih an sawi.
‘Zirtirtu indaihlohna a nasa in, zirna in leh hmanrua duh angin a tha tawk lo a. Ram hmasawnna thlen thei khawp zirna nei tur chuan tun aia nasa in zirna lamah mipui leh sawrkarin hma kan lak a ngai. Lehkhabu dawn kim loh kan aupui fo tawh pawhin awmzia a la nei lo; kum chanve kan hmang tawh a, school enkawlna tur school grant pawh pek an la ni lo. Tui leh electric bill chu zirtirtu in anmahni sum atanga pe an awm bawk. Mizoram school a tha tia au dum dumte hian a hmunah ngei zirchiang se kan ti hle,’ a ti.
Lirtheia veivahna kawng a that tawk loh zia an hmu a, kawng tam taka hmasawnna tur tithuanawptu lian tak a nih theih avangin ngaihpawimawh tul an tih thu an sawi.
Hriselna lamah mipuiin enkawlna tha (health care) an dawng meuh lo nia a lan bakah inenkawlna hmun awm that lohna a tamin inenkawlna hmanrua thlengin an hnianghnar tawk lo hle tih an hmuh thu AAP hian an sawi. ‘Inkalpawhna tha lo nen, thingtlangmiten damdawi in tha zawk an panna kawngah nunna hlu tak an chan nasa a ni,’ a ti.
Khaw chhung leh pawnah ram awl tha, hman tangkai theih tur kan la ngah tih an hmuh thu te, eirawngbawlna gas luh lohna khua leh, a luhnaah pawh khaw danga kal ngai an la awm tam thu sawiin, LPG hnianghnar loh avanga thing tuah tur lak nan ramngaw in a tuar nia an hmuh thu te an sawi bawk.
‘Primary level atanga ram harsatna hi siamthat kan tum a nih loh chuan hmasawnna mumal kan nei thei ngai lo ang, tih hi kan ngaihdan a ni,’ AAP thuchhuak chuan a ti.
Sawrkar school a tha titute hian a hmunah zirchiang se – AAP
