Sawrkar sikul

A bial chhunga sawrkar sikul-te tihchangtlunna atana pheikhawk semtu Aizawl West II MLA Lalnghinglova Hmar chuan, sawrkar sikulah zirna a tha a; a bikin pawl sang lamah sawkar sikul-a luh kan intihhmuh a, kan inchuh nasat hle laiin a pawl hniam lamah erawh luh loh kan intihhmuh thung tiin, sawrkar sikulte hi a belh tlak a, a rintlak a, a tha tawk tih mipuiin an hriat a duh tih a sawi bawk.
Kan hre vek a, tunhma atang tawhin mipuiin private sikul an bawh nasa a, a chhan pawh sawrkar sikul aiin exam result an neih that thin zawk vang a ni a. A pahnihnaah chuan, private sikul-a kalte chu sawrkar sikul-a kalte aiin sap tawng an lo ti thei zawk a, sap tawng ngaisang hnam kan lo ni bawk nen, harsa tak chung pawhin, neih thinglung khawng takmeuh pawhin nu leh paten private sikul an bawh hram hram thin.
Sawrkar sikul leh private sikulte hi han khaikhin ila: Sawrkar sikula thawk tur zirtirtute chu naupang lehkha zirtir dan training chhuak vek an ni. An hlawh pawh private sikul zirtirtute hlawh let nga/let ruk aia tam a ni. Sikul building pawh private sikul aiin a lianin a changtlung zawk. Zirna hmanrua pawh private sikul aiin sawrkar sikul-in an nei tha zawk. Sawrkar sikul-a kal zirlaite chuan thla tin tuition fee an pe ve lo, private sikul-ah chuan tuition fee bakah khawntesep eng eng emaw a awm zur zut a, board exam turte chu hostel-a awm ngei ngei ngai ang deuhvin an kalpui, senso a hautak.
Sawrkar sikul dinhmun hi private sikul dinhmun aiin a enga kimah a tha zawk vek a, mahse private sikul result an pha ngai lova, chumi awmzia chu sikul kal chhan ber thiamna puakchhuah kawngah hlawh tlem zawk, untrained teacher ni si, facility leh teaching equipment nei tha lo zawk ni bawk si private sikulte result a that chhan chu eng dang ni lovin, zirtirtute an tang tihna a ni.
Chuti a nih chuan, sawrkar sikul zirtirtute chu an tang ve lo tihna em ni ta ang? Zirna hi a pawl hniam lam (elementary stage) atanga bul tan that hi a pawimawh nasa mai si a, sawrkar sikul lam erawh luhna tlakah nu leh parten an ngai mang lo tihna a ni deuh ber a. Kan ram hruaituten sawrkar sikulte belhtlak leh rintlak zawka siam an duh chuan, eng mah sen belh vak a ngai tawh lo, zirtirtute hi private sikul zirtirtute angin emaw, an aia nasa zawk pawhin tang ve se, sawrkar sikulte hi private sikulte aia a that zawk theihna chance a sang em em a ni. A enga kima changtlung zawk sawrkar sikula zirtirtute pawh hian private sikul a tha zawk anga nu leh paten an ngaihna chhanah hian a mawhphurtu an nihna hi chhut chiang ve se, private sikulte lehpel tur hian tan han la ve tak tak se, kar lovah an dawk chho zawt zawt ngei ang. Sawrkar sikul zirtirtute an tan a ngai a ni ber e.