Congress party chu MNF sawrkar rorel dan that loh vanga sawrkar tur an ni ringawt loa, a aia tha leh belhchian tlak sawrkar tha din an tumna zawk chu mipuiin party dangte aia an thlan chhan nise an duh ber tih Congress thupuangtu Dr Lallianchhunga chuan a sawi.
October 5-7 chhunga Champhai South bial a fannaah All India Congress Committee member ni bawk Dr Lallianchhunga chuan Congress party chuan Pu Lalsawta kaihhruaina hnuaiah mirethei leh pachhiate pawh hlim taka an awm theih na tur sawrkar, kalphung dik an din thei dawn tih a sawi. “Congress party hi MNF rorel dan that loh vanga sawrkar tur kan ni ringawt loa, MNF sawrkar aia tha leh belhchian tlak sawrkar tha din kan tumna zawk hi mipuiin party dang aia min thlan chhan nise kan duh ber,” a ti.
Lui pawh a hnar a fim chuan a mawnglam pawh a fim thin ang tho chu ram rorelna pawh a ni, tiin, CM atan sum lama mi dik leh rinawm tinzawn phawt turin MPCC thupuangtu hian a sawm. “MNF-in SEDP leh SASCI sum an thlamuanpui em em laiin, Congress chuan Lalpa kan Pathian hming kan lam zawk ang,” a ti.
“Sawrkar tha din kan tum hi min thlan chhan nise”
