Sawrkar thaah mipui thla a muang – Dr K Beichhua

Sawrkar thaah mipui thla a muang
– Dr K Beichhua
Ram hruaitu tha awmnaah chuan mipui thla a muang thin a, Mizorama kan sawrkar hrawn mek chu thlamuanpui tlak niin a lang lo tih MLA Dr K Beichhua chuan a sawi.
Thawhtannia BJP office-a inkhawmah BJP State Core Group member ni bawk Dr K Beichhua chuan, ram hruaitu tha awmnaah chuan ami chengte thla a muang a, ram hruaitu tha lo awmnaah erawh mipui thla a muang thei lo tih sawiin, India leh Pakistan inbeihnaah India ram hruaitute hmalaknaah ram mipui kan thla a muangin, India ram hruaitute hmalaknaah kan zalen em em mai chu a hlu hle tih a sawi.
“Mizoram pawh kan sawrkar tawhah emaw sawrkar mekah mipui kan thla a muangin kan lungawi em? Miretheite an lawm em? tih hi kan inzawhna tur a ni a. Ram hruaitu tha kan neih leh neih loh a hrilhfiah dawn a ni,” a ti.
Kan social security a chhe hle a, social security kan ngaihpawimawh a ngai tih BJP MLA hian a sawi. “Kan nula tlangval tam tak ruihhlo bawihah an tang a, sawrkarin a ngaihthah hle in a hriat a ni. Mizo tlangvalte hi thenawm rama helten panga vel that ta se, state pum kan thirimin beilet turin kan thawk chhuak duh ngei ang. Tunah silaiin min kap loa, silai aiah damdawi hmangin min bei thung a, kan thalai duhawm tak tak khawlaiah an rui a, an muthlu a, mahni ina haw duh tawh lo leh chhungte pawhin a ngaihsak hleihtheih loh khawpin an awm a, ruihhloin a salbeh tlat an ni,” a ti.
Chief minister-in sawrkarna an siam hma khan UNO hriatpuia ruihhlo ngaite enkawlna tur hmun din a tum thu a sawi tih sawiin, vawiin thlenga ruihhlo ngaite tan sawrkarin hmalakna mumal a nei loa, UNO hriatpui lem loh tal pawha thalaite chhanchhuahna atan hma la turin a chah duh tih a sawi a ni.
Term hmasaa Social Welfare minister a nih laiin Sethawnah mi sangkhat len theihna tur, biak in pahnih leh damdawi in bakah addiction atanga an talchhuah huna an tangkaipui tur Skill Development Training Centre pawh Thingdawlah an din a, heng zawng zawng hi ZPM sawrkar chuan hmalak zui ahnehin, mimal enkawl thei tur a zawng a, a hmu thei bawk si lo niin Dr K Beichhua hian a sawi.
Tunhnai TBCC-a thil thleng hriat leh phei chuan sawrkar hi innghahna tlak, thlamuanpui tlak niin a lang ta lo tih sawiin, “Sawhthing leh hmunphiah chingtute an thla a muang hek lo. Sawrkar thaah chuan mipui an thla a muang thin a, social security pawh a tha thin. Kan sawrkar hrawn mek hi kan thlamuanpui ta lo chu a ni,” a ti.