Lalchhuanliana Hmar
A hmasain kan Sawrkar thar hi kumthar Chibai ka buk a, dik tak leh rinawm taka rorelna kalpui tura beisei chungin duhsakna ka hlan bawk e.
Sawrkarna an chan phat atangin ni 100 chhunga an tihtur an sawite leh thil dang bawhzui nghalin hma an la nghal sang sang a, a lawmawm e. Sawrkarna la chang ngai lo leh mithar deuh vek an ni a, inzir tur tam tak neiin bul an tan tih erawh kan hriatpui tel a tul awm e. Minister zawng zawngten ATI-ah Training an nei dawn tih sawite hi han ti puitling ngei teh se. Kan Home Minister phei chuan ramri lam a ngai pawimawh hle tih hriat theihin Zokhawthar leh Assam ramria Police hmun kilkhawr ber berte a tlawh nghal vat a. Kan Chief Minister pawhin a bial chhunga Police Training School-a Training pass chhuakte hun va hmanpuiin leh Thenzawl puan tahtute a tlawh nghal bawk a, fuihna thu tha tak tak a va sawi a nih kha. Sawrkar laipui dawrin Delhi lamah a kal thu leh Prime Minister thlenga a hmuh thu news-ah kan hmu bawk a, an viak tha viau a ni.
Kan sawrkar thar hian ram rorelnaa Pathian ram thlentira, rorelna dik leh tha zawka kalpui an tum thu an aupui kha an tlinpuiin an mawhphurhna pawh a sang hle a ni. Hetiang thlentir tur hian hmasawnna sum an hman dik tur thu leh an MLA zawng zawngten an eiruk loh tur thu an intiam theuh a nih kha. Ram rorelna dik leh tha zawka kalpui hi mipuite pawhin kan beisei leh duh dan a nih avangin roreltu tharte hi kan theihna zawn theuhah kan tanpui tur pawh a ni ang.
Kan CM khan dan loa thil tawlh ruk a tam thu leh sawrkar tharah chuan hetiang hi tihreh an tum thu a sawi khan dan an ngai pawimawh dawn tih a sawina a ni a, a thlamuanthlak hle mai. Police-te chu hemi kawnga hma latu tur an nih avangin an theihna sang ber chhuah turin a chah a, amah ngei pawh Police a lo nih tawh avangin discipline vawn that a tul thute, ruih theih thil laka fihlim a pawimawh thu a sawite kha dan keng kawhtu Police tan chuan hma lak nghal vat chi a ni ang. Kum tina Police thi an tam thin thu chuan a rilru a tihnat thu leh rapthlak a tih thute, tan ruala hriselna lam ngaih pawimawh tul a tih thute kha kan Police hotute hian hna hmasa berah an neih nghal a pawimawh hle mai. Hei bakah hian sawrkar official thenkhat, mipui chanai lo pawt peng thinte an awm thu leh an sim loh chuan action an lak tur thu thlengin a sawi bawk a. Kalphung thar sawrkarah chuan eirukna leh dawngdah taka sawrkar hna thawhte chu an en liam mai mai dawn lo tih hriat theihin kan hruaitu lu ber pahnihte thusawi atang pawh hian a lang a, zuzi lo hram teh se. Hrem ngaite hrem an nih loh hian mifelten an tuar zawk an lo ti hial thin a, dan hian lalna han chang ngei tawh teh se.
Kan Home Minister pawhin ramria Police-te tlawh nghalin an harsatnate a ngaihthla a. Police check gate chu engti kawng mahin ram danga chin kuhva leh dan phal loh bungruain a paltlang tur a ni lova, gate paltlang nana pawisa lak awm thin chu a rem tih loh thute a hrilh bawk a. Kan CM leh HM te thusawi atang hian dan leh thupek kenkawh that an tum thu a lo lang ve ve a ni. Tun hmaa dan lova ram dang atanga kuhva leh bungraw dang lo lut thin leh danin lalna a chan loh thinzia kha an vei hle tih a hriat theih bawk a ni. Kan ram hruaitu lu pahnihte thusawi atang hian dan leh thupek keng kawhtuten dik taka hna an thawh tawh a tul tih a lang a, tun hmaa lo inthlahdah deuhte tan pawh insiam thatna hun (wakeup call) ni nghal se a duhawm hle. Zep nak emaw, dan lo hi dan a ni ta emaw tih mai tur hian kan kal thui ta deuh niin a hriat a, sawi sen pawh a ni awm lo ve. Mipui tam zawk dikna duhtute hian dan anga kal hi an duh tawh avangin roreltu thar an thlang che u tih hre rengin, dikna leh huaisenna nen kan ram tan hna han thawk ula, bung thar min han kaipui ngei teh u.