Mizoram sawrkarin a din, Working Committee oh Ruihhlo Do chuan Mizoram pum khawtin fang chhuaka ruihhlo do pawl din leh kil thum atanga ruihhlo do a tum.
Ruihhlo bik do tura Mizoram sawrkarin a din, State Level Core-Committee on Ruihhlo Do hnuaia hma la tak tak tura ruat Working Committee on Ruihhlo Do hi Thawhtanni khan an chairman, Excise & Narcotics minister Lalnghinglova Hmar hoin an thukhawm a. Sawrkar department-a a kaihhnawih – Excise & Narcotics, Police, Social Welfare, School Education, Higher & Technical Education, Health department-a Food & Drugs Administration leh LESDE bakah pawl dang – CYMA, MKHC, MJA, MZP, MSU, Local Council Association, Teachers Federation leh psychology lama mithiam te an tel.
Mizoram puma ruihhlo do leh a kaihhnawih tihremna tura hma a lak dan tur sawi niin, sawrkara an sum mamawh (budget estimate) an pharh a. Budget estimate hi Mizoram sawrkarah a thlen dawn a ni. Heng bakah hian District & Village/Local Level Task Force on Ruihhlo Do din dan tur leh tul dangte an ngaihtuah.
Working Committee hian Mizoram pum, khawtin fang chhuaka ruihhlo do pawl din leh kil thum atanga ruihhlo do (supply reduction, demand reduction & harm reduction) dan tur ngaihtuahin, sawrkarin hemi kawnga sum mamawh a pek veleh a rang thei ang bera hma lak nghal a tum a ni.
Ruihhlo do kawngah hian sawrkar chuan supply reduction-ah Excise & Narcotics chu nodal department-ah a ruat a; demand & harm reduction-ah Social Welfare chu nodal department a ni thung.
Sawrkarin khaw tinah ruihhlo do pawl din tum
