ZPM sawrkarin tun thlengin mipui phun ri an la hre lo nia an sawi chuan an lal tawh zia a entir a, mipui phun ri hre lo ram hruaitu kan nei chu a vanduaithlak hle tih Congress hruaitu Dr Lallianchhunga chuan a sawi.
Zirtawpnia Congress Bhavan-a inkhawmah MPCC general secretary Dr Lallianchhunga hian, CM adviser pakhatin mipui phun ri an la hriat loh thu a sawi tih sawi chhawngin, hei hian an lal tawh zia a lantir tih a sawi. Congress hunlai aiin tui supply a chhe zawk a, electric supply a chhe em em a, mipui an phun luai luai laia mipui phun ri hre theilo ram hruaitu kan nei chu a pawi hle tih a sawi.
“ZPM sawrkar hi tunhnaia research an neihnaah mipui tam tak beisei an pha lo hle. Thla sarih lek chhungin thil tamtak an tisual tawh a, chiri takin an zan kal mek,” a ti.
Kan ramah vote base politician an tam avangin sawrkar a zan kal lek lek thin a, ZPM sawrkar pawh a chiri hle tih MPCC hruaitu hian a sawi a. Value-based hruaitu kan mamawh a, political party pawhin an mamawh tih a sawi.
“Mithiamte ka challenge duh chu, politic hi luhchilh ang u. Mithiamten politic in luhchilh loh chuan mi thiamlo zawkten ram an kaihruai a, ramin a tuar thin. Rorelna dik leh rorelna tha din tur chuan political party-ah piantharna a thlen a ngai. ZPM hian chutiang ni lo chuan sawrkarna an chang a, engmah danglamna a thleng thei lo a ni,” a ti.
AMC by election-ah MNF nen an thawk dun dawn a. Do thuhmun an neih vanga thawkho an ni loa, hun lo taka boral ta Ward VI corporator Pu John Zosangliana Ralte hmachhawp chu a nupui, Pi Lalrinfeli’n rawn chhunzawm se an duh vang zawk a ni tih voter-te pawhin lo hriatsak turin an duh tih a sawi a ni.
Sawrkarin mipui phun ri a hre lo hian an lal tawh zia a entir – Dr Lallianchhunga
