Sawrkarin MPSC thuam chak tawk lo
– MNF Thalai
Mizoram Public Service Commission chhawk zangkhai tura din, Mizoram Subordinate Service Selection Board (MSSSB) thiah chhan zinga chhuanlam, MPSC thuam chak belh zawk tura sawi chu a taka tih a ni lo tih MNF Thalai chuan an sawi.
MNF Thalai Hqrs hruaitute hian Nilaini khan MPSC office tlawhin hma an lakna leh an dinhmun an zirchiang tih an sawi a. ZPM sawrkarin MSSSB thiatin MPSC thuamchak a ni ang, tia an sawi angin sawrkarin MPSC a thuam chak lo tih an hmuh thu an sawi.
Thawktu lak belh leh infrastructure siam belh chungchangah pawh sawrkarin hma a la nep nia sawiin, MSSSB thiah a nih hnuah MPSC hnuaia exam conduct-te result rei tak chhuak thei loin a awm thin a. Hei hi thalai hna zawng leh zawng zel tur tam tak tan a pawi hle tih an sawi.
MNF sawrkar laia MSSSB-in Group B chin result fair tak leh rang taka a tih chhuah thin ang khan MPSC pawh Mizoram sawrkarin rang taka tichakin, exam result ti chhuak ve thin se tiin sawrkar an phut tih an sawi a ni.
‘MPSC kan thuam chak ang, tia sawrkarin a lo tiam tawh ang ngeiin, thawktute pawh lak belh a, an mamawh ang phuhru a, exam conduct apianga school building hman ngai lo tura ruahmanna thar siam a, MPSC Exam Hall, building zau tha zawk buatsaih sak turin Mizoram sawrkar kan phut a. A thawktu (manpower) assistant 2, UDC 1, LDC 5 leh Group ‘D’ a pek belh chu a lawmawm em em rualin, an mamawh ang zela thuamchak turin kan phut a, duh khawp awm si loa a thu chauha thuam chak lo turin sawrkar kan phut a ni,’ MNF Thalai hruaitute chuan an ti.
MPSC an tlawh atang hian, ZPM sawrkarin zirchiang miah loa MSSSB a thiah pawi zia an hmuchhuak chiang hle tih an sawi bawk.
Sawrkarin MPSC thuam chak tawk lo – MNF Thalai
