Mizoram sawrkar chuan 2026- 2027 sawrkar kum chhunga atan Mizoram Universal Health Care Scheme 2.0 a kalpui leh dawn a. Thawhtanni khan chief minister Lalduhoma’n a hawng.Chief minister chuan Mizoram Universal Health Care Scheme (MUHCS) atan hian a tirah vaibelchhe 50 an dah a, tam an ti viau na in a daih loa, sawrkar kum kal mekah vbch. 35 an dah belh a, sawrkar kum thar atan vbch. 130 dah a ni tih a sawi.
MUHCS-ah hian sawrkar hnathawk contribution chu vbch. 26.42 vel a ni a, Asian Development Bank atangin vbch. 803 an puk bawk a. Building, equipment, machinery leh man power-ah beisei leh rinlawk aiin an inseng hnem tih sawiin, “A hlawhtlinna erawh hmuh chhoh zel a ni a. A hlawkna teltu chu damlo leh mi harsate an ni a, sawrkarin insen zel a huam a ni,” a ti.
MUHCS kalpui mekah nunna atana hlauhthawnawm, emergency thilah, non empanel damdawi ina inenkawl theihna provision siam chu MUHCS 2.0 ah chuan siam danglam a ni tih chief minister hian a sawi. “A chhan chu, refer case a tam lutuk vang a ni a, ‘misuse’ a ni. Khauh zawka kalpui tum niin, ‘emergency /life threatening provision’ in huam tur chu – ICU-a admit nghal ngai ang chi, nunna chhanna atana zai nghal ngai, chetsualna avanga zai nghal ngai ang chi tih lohah chuan refer theih a ni tawh lo,” a ti.
Mizorama private damdawi in, tuna MUHCS lam zawm ve loten an zawm ngei theihnan sawrkar chuan indawrna a kalpui chhunzawm zel tih a sawi a. Rate-ah inremna a awm theihnan proposed package siam turin an ti a, heng damdawi inte hian MUHCS 2.0 ah chuan, mipui tan, tia sawrkar thawhpui turin a sawm tih a sawi a ni.
Health minister Lalrinpuii chuan, MUHCS kalpui mekah non empanel hospital-ah mi 4873 inenkawlna senso atan cheng nuai 2160 an hmang tawh a. Sawrkar hmasa in Medical Refer Board kaltlanga state pawn lama an refer, enkawl chhunzawm zel ngai, MUHCS empanel hospital-a la kal thei si lo, an damdawi in pan pangngaia la kal ngai enkawlna atan cheng nuai 979 an seng tawh tih a sawi.
State pawna in-refer chhan ber chu, Mizorama enkawl theih loh natna – kal thlak ngai, cancer, thin thlak ngai leh ‘critical case’ bikah chauh a ni tlangpui tih sawiin, chuti chung pawh chuan a senso a tam bik a, mi pakhatin nuai 35, 20 te an sen thin avangin a tam thin tih a sawi a ni.
MUHCS 2.0 atan hian kumin February 16 atanga April 15 thleng inziahluhna hun hawn a ni a. 2026 April 1 atangin hman tan tur a ni. Inziahluh hun chhunga inziaklut lo tan kumin June chhung inziahluhna hun, ‘grace period’ hawn a ni anga, heta inziahluhna man erawh a hun pangngaia inziahluh man aiin zaa 50-in a sang dawn a ni.
MUHCS leh a chhehvel:
8 MUHCS-ah hian tun thlengin Mizoram-a private leh kohhran damdawi in 16 leh Day Care Centre 3 in an zawm (empanel) tawh a. State pawn damdawi in 33-in an zawm tawh bawk.
8 Mizoram-a zawmtu private/ kohhran damdawi in hnenah hian sawrkar chuan corpus fund pechhuakin, damdawi in-in corpus fund a dil atangin cheng vbch. 3 pekchhuah a ni tawh.
8 Corpus fund hi damdawi in khum neih zat mila bituk niin, khum 150 chin hnuailam awmnaah nuai 50, khum 151- 250 inkar nei tan nuai 80, khum 250 chin chunglam nei tan nuai 120 pek theih a ni.
8 MUHCS bill atan sawrkar chuan cheng vbch. 157.61 a pechhuak tawh a, MUHCS hnuaiah hian ‘golden card’ nei AB PM-JAY a inziaklutte pawh sengluh vek an ni.
8 AB PM-JAY hi central scheme a nih angin, damlo bill atan bika sawrkar laipuiin kum khat atan zela state sawrkar a rawn pek chu cheng vbch. 20.5 a ni a, hetihlai hian MUHCS hnuaiah vawiin thlenga AB PM-JAY hmangtute tana sum a senral tawh chu cheng vbch. 56.82 a ni
Sawrkarin MUCHS 2.0 kalpui dawn Empanel lohah khauh an tum tawh
