Sawrkarin ruang phurh man a tum dan tur inkaihhruaina a siam zo a, hemi ang hian hman tan a ni dawn tih Social Welfare minister Lalrinpuii chuan a sawi.Ruang phurhna lirthei hman man dilnaah Directorate of Social Welfare & Tribal Affairs chu implementing agency a ni tih Social Welfare minister hian a sawi a. Ruang phurh hi km.20 aia hlaah chauh hman tur niin, ruang phurhna lirthei bik a huam a, kea kalpui leh ngai a nih pawhin lirtheiin a thlenpui theih chin bill tur niin, an lirthei hman hi cheng nuai 17 aia to lo a nih ngai tih a sawi. Tih chin an neih chhan chu, lirthei cheng nuai 17 aia to ho chu a hman man san bik vang a ni tih a sawi a ni.
Ruang phurhna man hi a kilometre zat atanga chhut tur niin, State Transport Authority-in lirthei hire rate a siamsa, hman mek chu zawm tur niin, a kalkawng pawh a tawi thei ang ber hman tur a ni. Dilna form hi Directorate of Social Welfare & TA atanga form siamsa hman tur niin, internet/online a download theiha dah a ni tih minister hian a sawi.
Ruang phurhna lirthei hman man dilnaah report form thil tel tur a ni a. Damdawi ina thi an nihin medical officer, ina thi an nihin local council/ village council emaw an awmna branch YMA/ YLA/ MTP/YCA president te hriatpuina lak a ngai a. District Social Welfare officer/ deputy commissioner verify a ngai a, DSWO awm lohnaah CDPO hman theih a ni dawn tih a sawi bawk.
Zawhna chhangin department hotute chuan, lirthei hire tur hian empanelled list neih an tum tih an sawi a. Ruang phurhna hmun tur azirin empanelled-a tel kher lo pawh hman theih a ni dawn tih an sawi. Re-imburse tur a nih avangin hetianga tih hi a remchang hle turah an ngai tih an sawi a. Bialtu MLA-te an lo pun lailawk a nih pawhin, MLA hian a rawn bill mai turah an ngai tih an sawi a ni.
Raltlan chungchang chu hetah hian an ngaihtuahnaah a tel loa, MLA-te phurtir chhawkna chu he thilin a tum ber a ni, tiin Social Welfare minister hian zawhna a chhang bawk.
A tak taka hman hunah, engemaw fuh lo lai a awm chuan thlak chhoh zel tur a ni dawn tih an sawi a. Ruang phurh dan leh lirthei hman dan chungchangah thu inchuh a awmin, SWTA & WCD secretary chu thutawp siamtu tur a ni dawn tih an sawi a ni.
8 Ruang phurhna hian lirthei pakhat a huam a. He dan hian ruang phurhna lirthei hman hawh man chauh a huam.
8 Ruang phurhna lirthei hman man hi ruang phurh tanna hmun leh ruang dahna khaw inkara lirthei hman man a ni.
8 Ruang phurhna hlat zawng chhut nan ruang chhuahna atanga a dahna hmun khaw kar hlat zawng (actual distance) lak a ni anga, lirthei thlen lohna khua a nih chuan lirthei thlen theih tawpna thleng a ni anga; ruang phurhna kawng hi a tawi thei ber (shortest route) hman tur a ni.
8 Ruang phurhna lirthei hman man diltuten thla khat chhungin dilna hi (application form siamsa angin) Social Welfare &TA director hnenah emaw an district-a District Social Welfare officer hnenah emaw thehluh tur a ni a, an lirthei hman man hi sawrkarin rate a siam angin a rul let ang.