Sawrkarin school tha tehna siam dawn – Education minister

Zirna siamthat tumna kawng khatah school tha tehna siam a ni dawn tih School Education minister Dr Vanlalthlana chuan a sawi.
Akhil Bhartiya Shiksha Samagam (ABSS) leh National Education Policy (NEP) 2020 kum ruk tlin champha chu Nilaini khan lawm a ni a. Hmanpuitu Education minister hian, sawrkarin zirna siamthat kawngah school tha tehna siam tum a ni a, School Assessment Board din a ni dawn tih a sawi. Skill development-ah Mizoram Board of School Education chu awarding body an nih theihnan an nawr mek a, zirtirtu transfer & posting chu online-a kalpui a ni dawn tih a sawi bawk.
Mizoram sawrkarin engineering college-a class neih thuai a nih theihnan hma lak a ni a, nakum atanga class tan tum a ni tih Higher & Technical Education minister ni bawk Dr Vanlalthlana hian a sawi a. National Institute of Technology Mizoram campus Lengpuia dah tum chu a hlawhtlin theihnan sawrkarin theihtawp a chhuah a. NIT dang ai pawhin campus an nei tha dawn tih sawiin, Mizoram sawrkarin forest clearance atan cheng vaibelchhe 10 a pe a, hei hian NIT hotute a ti lawm a, theihtawp chhuah tum a ni tih a sawi.
Mizoram Education Reforms Committee working chairman Prof Lalbiakdiki Hnamte pawhin, NEP tihhlawhtlin kawnga harsatna awm hrang hrang a sawi a. Exam kalpui dan kalphung siamthat a tul thu leh zir dan phung siamthat a tul thu a sawi. Sawrkarin technology hmanraw hrang hrang a sem thin chu hman tangkai a tul tih sawiin, NEP 2020 rawtna tha tak tak chu tuna Mizoram zirna kalphung enin tihhlawhtlin harsa tak tak a awm a, school stage mai bakah college leh university-ah pawh a tak takah chuan kan zirna ruangam neih mekah tihhlawhtlin mai theih loh a awm tih a sawi a ni.
Champha lawmnaah hian Mizoram Education Reforms Committee member, School Education director leh officer-te, Higher & Technical Education director leh officer-te, MBSE chairman leh officer-te, SCERT director leh officer-te, Samagra Shiksha state project director leh officer-te, college leh higher secondary school principal-te, zirtirtu association hruaitute leh tlawmngai pawl hruaitute an tel.