Sawrkarin uniform cadre dinhmun
chawisan zel theihna tur ruahman
– Home minister
Uniform cadre-te dinhmun chawisan zel a nih theihna turin sawrkar hotuten ruahmanna an siam a, uniform cadre-in ngaihsan a hlawh leh mek tih Home minister K Sapdanga chuan a sawi.
Central Training Institute Sesawng-a basic training course nei zo Prison department-a jail warders batch 14-na chuan June 20 khan passing out parade an neih a hmanpuinaah Home minister chuan, nitinin lehkha thiam tak takte hnen atangin Home Guard dilna an dawng reng a. Tunhnaia police an lakah pawh mithiam tak tak, degree sang tak tak neiten an dil nasa a. Degree sang apiang an tling hran loa, tlin tuma theihtawp chhuaha beiten hlawhtlinna an chang tih a sawi.
“Vawiinah hian uniform cadre-te dinhmun chawisan zel a nih theihna turin kan hotuten ruahmanna an siam a, uniform cadre hian ngaihsan a hlawh leh mek,” a ti. Ram ven hna thawktute tan thahnemngai takin sawrkar pawh a inbuatsaih tih a sawi a ni.
Uniform hak chuan dan leh thupek zawmtu an nih tih a lantir avangin zah a, ngaina tur leh uluk taka vawngfai thin turin a fuih a. “Uniform hi khawvela thil zahawm pawla sawi a ni thin a, uniform hian ken tel a nei a, tha taka uniform kan hak hian thupek a keng tel nghal. Khawtlang nunah zahawmna min siam a, uniform hak tur nia ha taima turin ka fuih che u a ni,” a ti.
Training chu service atan chauh ni loin, nitinin midangte nena khawsak hona thlengin a pawimawh tih a sawi bawk.
Basic training hi kumin April 26 atanga neih tan a ni a, thla hnih chhung neih a ni. Warders training chhuakte hi an vaiin mi 29, mipa 18 leh hmeichhia 11 an ni a; training neih chhunga titha bik mi panga thlanchhuah hnenah lawmman hlan an ni.
Sawrkarin uniform cadre dinhmun chawisan zel theihna tur ruahman – Home minister
