Deputy chief minister Tawnluia chuan sawrkar hmalakna hrang hrang zingah zirna chu sawrkarin a ngaihpawimawh ber te zinga mi a ni tih sawiin, tunhnaia Council of Ministers meeting neih zawh takah pawh sikul engemawzat dinhmun chawisan a ni, a ti.
He thu hi deputy chief minister hian nimina Chalrang leh New Chalrang khuate a tlawhnaah a sawi a. New Chalrang Community Hall-a inkhawm tawi buatsaihah thu sawiin, bialtu a nih anga hmalakna a neihte hmuh theiha a awm chu lawmawm a tih thu a sawi a. Lakhuihthei chingtute hma ngaiin, Sialhawkah lakhuihthei sawngbawlna buatsaih mek a ni, a ti bawk. New Chalrang khaw chhunga hmasawnna hna cheng nuai 190 man chuang thawhnaah Chalrang leh New Chalrang ni zung chakna hmanga tuilakna, tui dahkhawlna pathum litre 250,000 dawng te a tel tih tarlan a ni bawk.
Dy chief minister hian nimin vek khan Vangtlang tlawh nghalin Vangtlang Water Supply Scheme leh Community Hall a hawng bawk a. Vangtlang Water Supply Scheme (Solar Pumping) hi Jal Jeevan Mission 2021-2024 hnuaiah cheng nuai 320 senga siam a ni a. November ni 9, 2022 khan hna thawh tan niin, zawh hun tura ruat November ni 9, 2023 hmain peihfel a ni a, ni tin tui litre 37,000 pump chhuak thei tura duan a ni.
Dy CM chuan Vangtlang khua chuan hun lawmawm tak a tawng mek a ni tiin, hmasawnna an hmuh thenkhat – in tina tui pek te, Community Hall thawmthat te leh Vangtlang High School Lumpsum Category C-a hlankai an nih thu te a tarlang bawk.
Sawrkarin zirna a ngai pawimawh: Dy CM
