Sawrkarin Zofate hnam
tobul chhuichhuah tum
Zofate hnam tobul, sawrkar pawmpui leh mipui pawm tlan theiha chhuitu tur insiam a ni tih chief minister Lalduhoma chuan a sawi.
Zofaten ‘Chhura Thawnthu’ kan neih dan lehkhabua Padma Shri RL Thanmawia’n a siam chu Thawhtanni khan chief minister hian a tlangzarh a. Chhura chanchin kan hriat dan tlanglawn chu lakkhawm harsa a nih a rinawm loh laiin, Zohnahthlak hnam hrang hrangin Chhura chanchin an hriat dan leh inhlanchhawn dan rintlak tak lak khawm erawh a hautak a ring tih sawiin, harsa mahse a pawimawh zia hria a, a puitling ta chu a ziaktu fakawm a tih thu a sawi.
“Chhura chanchin hian Zofate hi hnam khat kan nih zia min hrilh a, hnam bil tawngte a danglam hlek hlek angin a hming pawh a lo danglam hlek hlek chauh a. He lehkhabu hi Zofate inpumkhatna kawngah a tangkai dawn a, mitinin neih theuh tum ila a lawmawm ngawt ang,” Lalduhoma hian a ti.
Zofate hnam tobul chhuichhuah a, sawrkar pawmpui leh mipui pawm tlan neih chu sawrkarin tul a ti a. A bultantu tur an insiam chho mek a. Sawrkarin Zofate tobul leh kan inpumkhatna a ngaipawimawh hle tih a sawi a ni.
Lehkhabu ziaktu Prof RL Thanmawia chuan lehkhabu 37 a buaipui ve tawh zingah Chhura lehkhabu hi a hautak ber pawl nia a hriat thu sawiin “Hnam peng hrang hrangin anmahni tawnga ziaka dah fel thlip thlep an lo nei loa, hnam peng 30 velin Chhura chanchin hi kan nei niin ka hria a, chu’ng zinga hnam 16 velte thawnthu chauh chu tunah hian ka la lakhawm thei rih a ni,” a ti.
Pathian zarah an la tihbelh zel thei turah a ngai tih sawiin, lehkhabu a buatsaih dan a sawi a ni.
Sawrkarin Zofate hnam tobul chhuichhuah tum
