SC-in forest kutah ramngaw kaihhnawih thil ni lova ramngaw hman pe vek turin ti

SC-in forest kutah ramngaw kaihhnawih thil ni lova ramngaw hman pe vek turin ti
Supreme Court chuan state tin chief secretary leh union territory tina administrator-te hnenah hriattirna pein an huam chhung theuhvah revenue department-in ramngawte ramngaw kaihhnawih thil ni lo (non-forest activity)-ah hman a ni em tih chhuitu tur special investigation team din turin a ti a. Chutiang hmang an awm chuan forest department-a kir vek turin a ti bawk.
Chief Justice of India B.R. Gavai-a kaihhruai judge dang pahnih, Justice Augustine George Masih leh Justice K. Vinod Chandran te awmna bench chuan state tin thuneitute chu mi mal emaw, an hnuaia mi emaw, leh pawlin forest land an lo nei a nih chuan forest department-a pe kir vek turin a ti a ni.
Thutlukna siamna ziaktu, Chief Justice Gavai-a chuan, “Hetiang ram lak kirte vantlangin a hlawkpui tham khawp a nih loh chuan state leh union territory-te chuan a hmang/luahtu mi mal leh pawl (institution) hnen atangin a man an la tur a ni a, chu pawisa chu ramngaw tihhmasawnna/siamna atan hman tur a ni,” a ti.
Heng thil zawng zawng hi kum khat chhunga tifel vek turin court chuan a ti bawk.
“Chief secretary leh administrator zawng zawngte chu vawiin atanga kum khat chhunga ram inhlanna enpuitu tur special team din vek turin a ti tur a ni a. Heng ramte hi ramngaw siamna atan chauhva hman tur a ni ang,” tiin court sang ber thupekah tar lan a ni.
Supreme Court-in hetiang thutlukna a siam hi Maharashtra-a Pune district-ah, Kondhwa Budruk-a ramngaw hectare 11.89-a zau chu kum 1998 khan dan lovin lo neihna atana hman a nih avang leh a kum lehah in satu hnenah hralh chungchang petition lut a ngaihtuah atanga chhuak a ni.
Chief Justice Gavai-a chuan he thil hi ‘politician, sorkar hnathawk leh in satu te inkara thil thleng, ramngaw hlu tak sumdawnna atana hman entirna tha tak a ni’ tih a sawi.
“Ram pharh zau tak, ‘forest land’ tia chhinchhiah hi a neitu chu revenue department a la ni reng a. Hetiang hian tun thleng pawhin hnuhma a la nei reng a. Forest department-in a hnial chungin revenue department chuan ram hi mi mal/institution hnenah non-forestry activity atan a hmantir a. Hei hian ram hring tha a titlem zel a ni,” tiin Chief Justice Gavai hian thutlukna a siamah a tar lang bawk.