Manipur sokar status report a May thlaa ethnic violence chhuah atanga FIR 6,523 lai report awm chu State-a ‘Constitutional machinery hlawhchhamzia lanna a ni’ tiin Supreme Court chuan a sawi.
“May thla tir atanga July thla thleng thil inlailang hian constitutional machinery hlawhchhamzia a pholang a ni. State-ah law a awm lo va, law and order a hlawhchham takzet a ni. Law and order-in khua leh tuite a humhim thei lo a nih chuan eng nge awm tawh chuang?” tiin Chief Justice of India D.Y. Chandrachud, three-judge Bench kaihruaitu chuan sorkar aiawha ding Solicitor-General Tushar Mehta hnenah a sawi a.
Supreme Court chuan Manipur Director General of Police chu amah ngei August 7 a ngaihtuah hunah court a inlan turin a ti bawk a, zawhnate a chhang thei ngei tur a ni a ti bawk.
Chhui muang, man tlem
Thupek a siamah Court chuan a landanin police-te hnuchhuia ‘muang lutuk’ tiin a sawi bawk a, dan bawhchhiatna thleng leh FIR theh luh inkar chhungah leh thuhretute thuzawhfiah inkarah hun khawhral a tam lutuk. Mi tlemte chauh inkar hlat tak takah manin an awm a ni, tiin Bench chuan a sawi bawk a.
Mehta chuan State dinhmun chu police te hnuchhui nan a duhawm loh em avangin che hleithei lova siamin an awm a ni thei tiin a chhang thung a.
“May 4 atanga July 27 thlengin thil langchiang tak chu police te chuan engmah thunun an nei lo. Dinhmun a chhiat em avangin FIR te pawh register theih loh tihna em ni? Mi pahnih khat vel tih loh chu man pawh an awm miah hlei nem. Investigation a muang em em a, FIR te pawh thla hnih hnuah te ziah luh chauh a ni a, statement te pawh record-in a awm lo” tiin Chief Justice Chandrachud chuan a sawi bawk.
Court chuan engtiangin nge Central Bureau of Investigation (CBI) chuan case 6,000 chuang an chhui theih ang tia sawi bawkin Chief Justice chuan case tam lutuk phurrit chuan CBI te pawh che thei lovin a siam thei a ti bawk.
Thla liam hnuah FIR ziah luh chauh
He hearing neihnaah hian Court chuan a hma zana State sorkarin status report a siam chu a enfiah a. Court chuan case pakhat car atanga nu pakhat leh a fapa May 4 a mob tena hnukchhuaka an sawisak hlum chungchang enfiahin he thila FIR chu July 23 ah ziahluh chauh a ni a.
Court chuan case dangah pawh mi pakhat chu tihhlum niin a chenna in chu halsak zui nghal a ni a, thla hnih hnuah FIR ziah luh chauh a ni bawk. Case dangah pawh CCTV footage chu investigator tena hnuchhui bul an tan rualin ‘auto-deleted’ in a awm bawk.
State sorkar status report chuan nunna chan 150 an awm tiin May 3 leh May 5 inkara nunna chan zat chu 50 a ti a. May 27 leh May 29 inkarah nunna chan dang 28 an awm leh a ti bawk a. June 9 ah nunna chan dang sawm pathum an awm a ti leh bawk a.
Report chuan intihbuaina avangin hliam tuar 502 an awm ti bawkin, hmun halsak 5,101 a awm a ti bawk a. Mi 252 man niin hei bakah hian fimkhur thu hlaah mi 1,274 man an ni a ti bawk.
‘FIR 11 CBI te hnena pek tur’
Report chuan case 6,523 preliminaryexamination neihnaah FIR 11 bik chu hmeichhia leh naupang te laka dan bawhchhiatna a ti a, hei erawh la tihchian zual tur niin he case 11 bikah hian mi pasarih manin an awm a ni.
Mehta chuan Centre chuan Manipur sokrar remtihnain heng FIR 11 te hi CBI te hnenah chhui chian tura pek a duh a ni a ti a. Senior advocate Jaideep Gupta chuan FIR sawm pahnihna awmin chu chu hmeichhia pakhat nung chunga halhlum chungchang a ni a ti a. Advocate Nizam Pasah, Zomi Students Federation aiawh ding chuan FIR panga lai a thehluh te chu Solicitor-Gneral in case 11 a saiwlan bikah a tello a ti bawk a. Senior advocate Colin Gonsalves chuan case dang pakhat thalai la naupang tak a lu tansak pawh a awm a ti bawk.
Information tha tawk lo
Court chuan State-in status report a siama information a pek te chu ‘a tawk lo’ tia sawiin FIR te chu hlawm hrang hranga dahin a awm lo a ti bawk a.
“Tualthah emaw pawngsual emaw, in halsak emaw rukru emaw, chenna in leh hmun tihchhiat emaw, sakhaw biakna hmun tihchhiat emaw, mihliam nat emaw etc case hrang hrang awm zat in sawi lo,” tiin Court chuan State sorkar hnenah chuan a sawi bawk a.
Court chuan August 7 ah ngaihtuah leh tur tiin chutah chuan State chuan information pawimawh dang te, dates of commission of offences; dates of registration of zero FIRs te, case hrang hranga witness statement pek ni te, Section 161 statement record ni te, thil tisual puh te man ni te leh FIR a puha te hming te tarlang turin a ti bawk.