Ruling coalition a pary pawimawh tak pahnih Lok Janshakti party (Ram Vilas Paswan) leh telegu Desam party-te chuan tun hnaia Supreme Court in Scheduled Caste sub-categorisation a remtihah ngaihdan inang lo neiin BJP te chu dinhmun khirh takah a dah mek.
LJP (Ram Vilas) president Chirag Paswan chuan an party chuan review petition an thehluh tur thu a sawi laiin TDP chief leh Andra Pradesh Chief Minister N. Chandrababu Naidu thung chuan Supreme Court thutlukna chu pawma an lawm em em thu a sawi thung.
Kar kalta Ningani khan seven-judge Constitutional Bench Chief Justice D.Y. Chandrachud kaihhruai chuan majority judgement siamah States te chuan Presiential List a Scheduled Castes te sub-classify turin dikna an nei a ti a. A tum ber chu Scheduled Caste zingah rau rau pawh dinhmun chhe zawkte chu public employment leh education-ah duhsak bikna pek an ni thei tih a ni.
Supreme Court thuremna chungchangah BJP te chuan an ngaihdan chiang takin an la sawi ve lo thung a. Sub-categorisation a awm theih nan chuan sorkar chuan caste census a neih ngei a ngai dawn a, caste census chu Opposition tena an ngiat leh BJP ten an duh hauh lo a ni thung.
“BJP ten court thuremna kan hnawl emaw pawm vek emaw ngawt thei lo. Chhim lamah chuan a hlawkpui ang a, hmar lamah erawh a allies te mai ni lo voters te pawhin an hnawl phah ang. Opposition tena campaign an neihnaah BJP ten reservation an titawp dawn tia an aupui khan northern states-ah nghawng a nei lian hle a ni. Chuvangin BJP te chuan he thil hi fimkhur takin a ngaihtuah a ngai” tiin top NDA leader pakhat chuan a sawi.
Congress te pawhin chiangfakin engmah sawi an la nei lo chungin Karnataka Chief Minister Siddaramaiah leh telangana Chief Minister Revant Reddy te chuan lawmawm an tihthu an sawi thung. Bahujan Samaj Party president Mayawati thung chuan court thutlukna chu a duhloh thu sawi thungin BJP kaihhruai Centre sorkar chu Dalit cause uksak tawk lovah a puh bawk.
‘Dalits tan creamy layer awm lo’
Paswan chuan reservation thil bikah Dalits te tan ‘creamy-layer’ criteria hman theih a ni lo a ti a. “Dalits ten kum za tam khawih thiang lo ang te a entleu an tawh avangin Constitution chuan reservation a pe a ni. Creamy layer chu an educational leh financial position a zira siam a ni a. Eng anga lehkhathiam leh tha pawh ni se, social structure a an dinhmun chu a la danglam tak tak lo” tiin LJP (Ram Vilas) chief chuan sawiin, tun tlengin Dalits youth te chu wedding procession ah te sakawr chung an chuan te an la phalsak lo va, tun hnai lawkah pawh Dalit leader in temple a tlawh hnu lawkah then thianghlim a ni a ti bawk a. Paswan chuan an party bik liau liau chuan BJP te pawh rawn lovin review petition theh luh an tum tiin a sawi.
Poll promise
TDP te thung chuan court thutlukna chu lawmawm an ti ve thung a. Andra Pradesh-ah chuan ‘advanced Mala caste’ te SC quota hlawkna teltu lian ber ber te chuan Congress an thlawp a. Naidu-an Chief Minister term hnihna a chelh khan TDP te chuan Madiga community te reservation benefit chang tlema inngai te chu uksakin kum 1997 khan Scheduled Caste chungah category li lai a lo siam tawh a ni.
“SC classification issue a Supreme Court thutlukna hi lawmawm kan ti a ni. Kum 30 kalta khan Chandra Babu Guru chuan social justice a lo kalpui tawh” tiin naidu fapa leh Andra Pradesh Minister Nara Lokesh chuan a sawi.
BJP te pawhin Telangana a 2024 Lok Sabha inthlana seat 17 an laknaah chuan sub-quota hi a thlawp bawk a. State Assembly inthlan kum 2023 a neih hma khan prime Minister Narendra Modi pawhin Madiga community tena sub-quota an demand chu enfiah a lo tiam tawh bawk a. Khvang khan Manda Krishna Madiga, Madiga Reservation Porata Samithi leader chuan BJP a thlawp phah tawh bawk.