Tunhnai khan, sikul naupang bag rihzawng bitukin zawm a hlawh leh hlawh loh chu Lunglei district chhungah endik a ni a. |henkhatin kaihhruaina dan an zawm laiin zawm lo pawh an awm a; hei hi district education thuneitute thuchhuak an lo chian vak loh vang nia sawi a ni.
Kan hriat angin, Ministry of Human Resource Development hnuaia Department of School Education & Literacy chuan November 24, 2020 khan State leh UT Education Secretary zawng zawng hnenah ‘School Bag Policy 2020’ zawm theuh tura hriattirna lehkha a thawn vek a. Hei bakah hian he school bag policy hnuaia zirlaite tana ‘fun course’ leh ‘10-day bagless’ kalpui dan tur ruahman chu ngai pawimawh zual turin a ti nghe nghe a ni.
School bag policy hnuaiah hian, pre-primary atanga class X inkar zirlaite tana school bag rihzawng tur chu naupang rihzawng za zela 10 (10%) aia rit lo tur tih a ni a. Hetah hian ‘average body weight’ an chhut dan chuan, class 1 naupangte hi 16-22Kgs an ni tlangpui a, an bag rihzawng tur chu 1.6—2.2Kgs tihna a ni. Chutiang zelin class X te chu an lo lian deuh tawh a, average weight hi 25-45 Kgs a ni a, 10% chu 2.5—4.5 Kgs tihna a ni.
Tun dinhmunah hian, class IV-VII bag rihzawng hi 4.5Kgs a ni tlangpui a. Class IV chin chuan 2.5Kgs leh Class VII chuan 3Kgs aia rit bag an ak tur a ni lo. Pre-primary phei chu bag ahtir tur a ni lo.
Ni khatah class period a tam avangin text book, exercise book, tiffin box, study material, tui leh an bag rihzawng nen, school bag hi Kg 4-5 a tling awl hle a. Nu leh pa tam tak chuan an fate school bag hi sikul thleng an ahsak thin.
NEP 2020 hnuaiah, homework inpek chiam chiam ang kha phal a ni tawh lova, chuvangin zirlaibute hi school lamah a dahna tur (bookshelf) ruahman a, in lama an zir tur bak chu school-ah hnutchhiah mai tur a ni. Hei hi school tam zawk chuan an la kalpui thei lo.
Lunglei district tih ang hian, district dangte pawh hian han kalpui ve sap sap se, education thuneitu sang zawkte pawhin school inspection hi tun ai hian ngai pawimawh lehzual thei se, hmasawnna hmel thar a lang zawt zawtin a rinawm..
School bag rihzawng leh a behbawm…
