Nimina school education minister hova school education department quarterly review meeting neihnaah minister chuan ‘school inspection’ tha taka kalpui a pawimawh thu leh tan lak a ngaih thu a sawi a. Thawktute tan chuan office dawhkan hi kan pulpit a ni, tiin a sawi bawk.
Minister hian school inspection chungchang hi a sawi thui lo na a, education lama hma kan sawnna tura a grassroot pawimawh tak a ni, kan ti thei ang.
Tunhma deuh kha chuan Circle Education Officer-te khan an bial chhunga school-te kha an vil hneh hle a, kha khan school inawpna hrang hrang a siam tha niin a lang. CEO-in school a tlawh dawn kha chuan zirtirtuten CEO lo kal hmain zirlaite an ko khawm a, school building leh a chhehvel an thianfai a. CEO khan class hrang hrang a tlawh thin avang leh zirlaite zawhna a zawh thin avangin zirtirtute pawhin CEO lo dawnsawn dan tur zirlaite uluk takin an hrilh lawk thin a. Khatiang khawpa lo inbuatsaih a ngaih thin avang khan inspection khan school leh school inelna boruak a siam a, zirtirtute leh naupangte pawh an tang a, chu chuan rah tha tak a chhuah thin.
Khatianga school inspection neih thin ang kha tunah hian regular taka kalpui a ni ta lo niin a lang a, CEO chetvelna thawm hriattur hi a vang pharh mai a, nge thawm nei vak lo hian an tihtur chu regular takin an lo ti ve reng thin zawk?
Education minister-in school inspection tha taka kalpui a pawimawh thu a sawi danah hian, school inspection hi tha taka kalpui a ni lo deuh a ni ang tih a rin theih a. School education quality a that leh that loh hi DEO leh CEO te chetvelna (activities) hian a hril thui hle a. A chhan chu education service leh infrastructure a that leh that loh te, zirlaiten an class milin thiamna an nei em em tih thlenga endikna leh tehna (evaluation) siam thin a nih avangin leh, chung report te chu thuneitu sang zawkte hnena a thlen leh thin avangin, chu chuan school inelna a siam a, zirtirtute leh zirlaite pawh a ti tang thin a ni.
Heng zawng zawng hi a nih dan tur a ni a; mahse, tun dinhmunah hi chuan a nih dan tur hi a ni si lo niin a lang, chu chu kan education system a san theih loh chhante pawh a ni thei ang.
School inspection thawm hi tunhma ang khan hriattur awm leh se, zirtirtute leh zirlaite pawh an tang sauh ang a, chu chuan education quality tha zawk a hring chhuak ngeiin a rinawm.
School inspection
