School provincialise thuai turin
MIGOSTU-in sawrkar an ngen
Sawrkarin school provincialisation a kalpui theih loh chhan ber, rules fel lo siamthat a nih tawh avangin a taka kalpui thuai turin sawrkar school zirtirtute chuan sawrkar an ngen.
Mizoram Government School Teachers’ Union (MIGOSTU) chuan, sawrkar kal mekin sawrkar hmasaa school tam tak upgrade tawhna order a hnukkir thut chuan a ti hrilhhai hle tih a sawi a. Education minister Dr Vanlalthlana an dawrnaah school upgrade hi chief minister pawhin a ngaipawimawh a, revoke lailawk a nih chhan chu upgradation rules a fel tawk loh vang mai a ni a, kan thatna tur zawk, thingtlang leh khawpuia school huapzo thei tur relaxation clause siamsak a tum vang a ni tih a lo hrilh a, thlamuang takin sawrkar hmalakna an ngaichang ta tih a sawi.
Minister thusawi hi a dik a ni tih lantir turin cabinet chuan ‘Provision for Power to Relax’ a pawmsak chu an lawm hle tih a sawi a. Dan ang thlapa provincialise order chhuah hun ngaichangin an awm mek a. Chief minister leh Education minister leh minister zawng zawng chungah an lawm tih a sawi a ni.
‘Zirna hmanga khawtlang mipui leh mirethei zawkte dawmkanna leh thalai lehkhathiam rual tam tak tana eizawnna siamsak dan kawng awlsam ber pakhat chu, school upgrade/ provincialise hi a la ni tlat a. Khawtlang leh ram hmasawnna lian tak tak heng school awmna khua leh vengah hian a thleng thin,’ a ti.
Sawrkarin school provincialisation a kalpui theih loh chhan ber, rules fel lo lai a siamthat sak takah chuan budget-ah sum mamawh min dahsak tawh bawk avangin, tun financial year (2024- 2025) chhung ngeia kum kal tawha staff absorption kalpui tawh thin ang ngeiin, school provincialisation tih felsak ngei turin sawrkar an ngen tih MIGOSTU hian a sawi.
MIGOSTU sawi danin:
8 Sawrkarin school upgradation a kalpui chuan chhungkaw tam tak thleng phak hmasawnna a thleng dawn.
8 Naupang school fee chawi a ngai tawh lo.
8 Thalai lehkhathiam rualten sawrkar atanga hlawh an lak ve theih tak avangin employment generation tha tak a ni.
8 School building grant, a tlabal lai thawmthatna minor repair grant, maintenance grant, staff quarters sakna tur bakah zirlaite leh zirtirtute hamthatna t- teacher training, teaching materials, computer, tui leh electric man, library tih changtlunna leh thil dang tam tak sawrkar atangin an dawng ve thei tawh dawn.
8 Khaw mipui tan leh hah taka enkawl thintu VC tan a hlu in a chhenfakawm hle dawn.
School provincialise thuai turin MIGOSTU-in sawrkar an ngen
