Mizoram sawrkar, Directorate of Science & Technology hnuaia awm Mizoram Science Centre leh sawrkar laipui Ministry of Culture hnuaia awm National Council of Science Museums (NCSM) chuan Mizoram Science Centre Berawtlang Aizawl thawmthatna tur project atan August 2 khan Kolkata-ah inremna thuthlung an ziak.
Mizoram Science Centre (MSC) hi kum 2003-a hawn a ni a. Hawn a nih atanga tun thlengin tlawhtu thahnem tak an awm reng a; zirlai leh mipuiin an hlut hle. He Centre-a bungrua leh exhibits hrang hrang hi a hlui tawh a, thlak tharna chu he MoU hnuaiah hian kalpui a ni ang.
MoU hian MSC-a gallery awmsa tam tak thawmthat bakah thil thar tam tak dah belh a huam tel a. He project hi NCSM Kolkata khawih tur niin, sum ruahman hi vaibelchhe 3.98 a ni. NCSM hian zaa 90 a tum dawn a, kum hnih chhunga zawhfel tura ruahman a ni.
MoU-ah hian NCSM atangin director (Hqrs.) Rajib Nath leh MSC atangin Mizoram Science Centre member secretary, chief scientific officer Er H Lalsawmliana ten hming an ziahhnan a ni.
Science Centre thawmthatna turah thawhdunna thu thlung
