SCO thutkhawmah India leh Chinese defence minister inbia

SCO thutkhawmah India leh Chinese defence minister inbia
Defence Minister Rajnath Singh chu Zirtawpni khan Chinese Defence Minister Admiral Don Jun nen inkawmin ram pahnihten tuna a tha zawnga thil an kalpui dun mek chu chhunzawma inepna boruak awm thei pumpelh hram hram zel tha an ti.
Singh-a hi Qingdao, China-a SCO Defence Ministers Meeting-a tel niin hemi rual hian inkawmna remchang an nei.
General Jun nen hian ram hnih inkara neuh neuh awmte titha zel turin ‘hlawk takin an kawm a, hma lam thlirna thui tak’ an sawi dun a. Singh-a hian Kailash Mansarovar Yatra chhunzawm tur a lawmawm a tih thu a sawi bawk.
X-ah Singh-a chuan, “Chine Defence Minister Admiral Don Jun-a nen SCO Defence Ministers’ Meeting neihna, Qingdao-ah kan inkawm a. Kan pahnih inkara hlawk taka kawmin hma lam thlirna thui tak kan sawi dun a. Kum ruk zet a awl hnua Kailash Mansarovar Yatra chhunzawm a ni leh thei tur hi ka lawm a. Tuna kan kal dan tha chhunzawm zel tur leh inepna awm theite pumpelh zel tura tan lak ni se kan ti,” tiin a tar lang.
Singh-a hian General Jun-a hnenah hian Madhubani lemziak, Mithila, Bihar-a ziah chu a hlan bawk.
India leh China inkar hi rei tak a chhiat hnuah kum 2024 khan an inrina, Ladakh khawchhak lam, Depsang leh Demchok vela an sipai dah ve ve hnuk kirin an inpawh leh tan.
Kailash Mansarovar Yatra chhunzawm leh tur hi India atanga Tibet ram chhung thleng biakznna a ni a. Kum 2020 khan Covid-19 leng avangin tihtawp a ni a, June 30-ah hian hemi hnua a hmasa ber tan leh tur a ni.
Kailash Mansarovar Yatra-a tel pawl hmasa ber chuan July 10-ah Lipulekh Pass kaltlangin China an lut dawn a, India panin August 22-ah an chhuak leh ang.
Singh-a hi Ningani khan SCO Defence Ministers’ Meeting-a tel tur hian a thleng a, Admiral Jun-a’n a lo dawngsawng nghe nghe a. Ram dang aiawha kalte nen thutkhawm tan hmain thla an la ho nghe nghe.
Thawhtanni khan National Security Advisor Ajit Doval-a chuan Chinese Foreign Minister Wang Yi chu Beijing-ah a lo kawm tawh a, tun hnaia India-China inkara hmasawnna awm leh kalpui mekte sawi dunin inkungkaihna tihchangtlun dan tur te, mihring inpawhna tam zawk a awm theih nana thil tih dan turte an sawi dun.
Thawhtannia an inkawmnaah hian NSA Doval-a hian firfiaka chetna chu a theih dan ang zawng zawnga do a tul thu leh remna leh muanna a awm theih nana tan lak zel tha a tih thu a sawi a. Ram pahnih inkar thil bakah an chhehvel leh khawvel huap thil hrang hrang an sawi dun bawk niin Ministry of External Affairs (MEA) chuan a sawi.