‘Score pawh ka theihnghilh hial alawm!’ – Andreeva
Grand Slam tournament-a a thlensan ber tuma 2024 French Open semi-final lo khel ve tawh Russian tleirawl Mirra Andreeva chuan Thawhtanni zana Emma Navarro hneha a tum khatna’na Wimbledon quarter-final a luh tum khan an point hmuh dan (score) pawh a theihnghilh rum rum thu a sawichhuak!
Andreeva hian Navarro lakah 6-2 6-3 hnehna changin Centre Court mipui lawm pawh a hlawh hle a; inkhelh banah ‘score’ zat pawh a hriat mih loh thu a sawi!
Kum 18 leh ni 62-a upa ni chungin Andreeva khan quarter-final a lut a, kum 2005 daih tawha record lo siam tawh a chipui Maria Sharapova hnu lama Wimbledon singles last eight thei naupang ber a ni.
Sharapova khan kha mi kum khan title la zuiin, tun thleng hian SW19-a women’s singles champion naupang ber nihna record a la chelh zui ta ngat ngat a ni.
‘Future Grand Slam champion’ tia an sawi ve ngat Andreeva hian tleirawl mai ni chungin tennis tournament level inkhaidiat dana a sang ber major tournament an tih hnuai chiaha mi WTA 1000 title pahnih a sualchhuak der tawh a, kumin hian a career ranking-a a tawnsan ber hun thlengin world number six a luah.
Wimbledon kal laiah hian set a la hloh lo a, Navarro lakah pawh hneh takin inkhel a thunun leh.
Andreeva coach chhawr lai Conchita Martinez hian kum 1994 khan player ni chungin Wimbledon title a lo hlawhchhuak ve tawh a, kum 2017 khan coach ni chungin Garbine Muguruza chu he trophy hi a lo lakpui tawh bawk.
Wimbledon semi-final luh inchuh match pakhata Andreeva tum tur hi Switzerland nula Belinda Bencic a ni.
Wimbledon title la hawn ve lo world number one hlui Iga Swiatek pawhin a zawna Grand Slam quarter-final tum li a luhna ni turin khawsik chunga khel Denmark player Clara Tauson lakah 6-4 6-1 hnehna a chang a, world number 19 Liudmila Samsonova nen semi-final luh inchuhin an inhmachhawn ang.
Eighth seed Swiatek hi kumin chu chetthat tluantlin a harsat tlatna grass chungah a kal tluang ta phian a, tuntuma last eifht a han lut leh chiah phei hi chu a inringtawk hle tawh tih a hriat a, engpawh hmachhawn tura inpeih at reng a tum tih a sawi.
“Kumin hian ka game khel chhuak thei turin ka insawrbing tlat a, a theih anga thui thlen ka tum leh dawn a ni,” a ti.
Spain nula Jessica Bouzas Maneiro laka 7-5 6-4 hnehna nena last eight inpal thleng Samsonova pawh hi kumin Wimbledon zet chu a khawng rei ta fu mai a, a match khelh hnuhnung vawi thumah game 13 chiah a la hloh a, Spaniard Maneiro lakah fiahna hautak zawk hmachhawn bawk mah se darkar khat leh minute 43 chhung inbeihnaah a dingchang zawk leh ta tho a, a tum khatna atan Grand Slam quarter-final a lut ve ta hial a ni.
A vawikhat Wimbledon quarter-final luhnaah Bencic pawh Thawhtanni khan a insum zo lo a, 7-6 (7-4) 6-4-a Ekaterina Alexandrova a hneh hnuah a mittui a dang zo lo.
Chawlhkar hnih liamta mai khan Bencic hi Russian 18th seed Alexandrova hian Bad Homburg Open-ah 6-1 6-2-in a sawp a, Thawhtanni round of 16 match-ah pawh khan rinkai zawka puan a ngam awm loh khawp mai a, mahse, SW19 fourth-round boruak meuh chu a dan a lo dang deuh nge ni dawn tournament lian zawkah a chak ta hlauh a ni.
‘Score pawh ka theihnghilh hial alawm!’ – Andreeva
