Scorpions bassist thin Francis Buchholz a thi
German rocker, Scorpions bassist thin Francis Buchholz, kum 71, chu an rama January ni 23 zing lam khan cancer avangin a thi a, a thih thu hi a chhungten Facebook post-ah puangin, “Lungngaihna leh thinlung rûm chungin kan hmangaih Francis chuan cancer natna avangin mual a liam tih kan puan a ngai ta. Amaah hmangaihtu ten duat taka an dawm laiin thlamuang takin he khawvel hi a chhuahsan ta,” an ti.
Buchholz hi Hanover, Germany-ah February ni 19, 1954 khan a piang a, Scorpions-a a tel hmain band hrang hrangah a lo tikual ve hman tawh a, a hnuah Scorpions guitiarist ni ta Uli Roth nen Dawn Road group-ah te pawh an lo tiho zak zak tawh. Scorpions hi 1965 khan guitarist Rudolf Schenkerleh a high school kalpui thin thian pathum- drummer Wolfgang Dziony, bassist Lothar Hemberg leh lead/rhythm guitarist Karl-Heinz Vollmer te nen an din a ni a, lineup an inthlak kual ve zak zak nuah 1972 khan an album hmasa ber Lonesome Crow an tlangzarh a, chuminu lawkah an kehdarh zui ta mai a ni.
Rudolf Schenker leh Klaus Meine ten Dawn Road an zawm ve leh a, chumi hnuah Dawn Road chu Scorpions tihah bawk an thlak leh ta. 1974-ah an LP Fly an tlangzarh a, 1975-ah In Trance an tichhuak leh bawk. 1976-a an album cover-a hmeichhe kumtling lo tideuh keng kung thlalak an hman avangin an chhe lar hle a, 1979-ah Love Drive an tlangzarh leh a, rimawi khawvelah hriat an hlawh tan ta a ni.
Buchholz hi Scorpions-ah kum 18 telin, German history-a best-selling band an ni a, an album 12-ah a kut a thlak tel vek a, an album hlawhtling ber, 1982-a an tlangzarh ‘Blackout’-ah pawh khan a tel a, he album hi an hla hit “No One Like You’ awmna kha ni. 1984-ah ‘Love At First Sting’ an tichhuak a, Billboard 200 (US albums) chart-ah No.6 a kai a, an album hralh kal ber a ni zui a, he album-a hla ‘Rock You Like a Hurricane’ leh ‘Still Loving You’ te pawh keini ram thleng thlengin kan lo hre bel hle a nih kha.
‘Rhythm of Love’ hla awmna, 1988 album ‘Savage Amusement’, te leh Scoprions tih tawha rilrua rawn lang nghal ‘Wind of Change’ hla awmna ‘Crazy World’ album-ah te pawh Buchholz hian kut a thlak vek a, band tana a recording hnuhnung ber chu 1993-a ‘Face the Heat’ kha a ni ta a ni.
Band a chhuahsan hnuah rimawi a chawlhsan deuh a, 1996-a bass guitar perh zirna lehkhabu ‘Bass Magic’ a tichhuak a, 2012 khan Temple of Rock group-ah telin European Tour te neiin, 2013-ah LP Bridge the Gap an tichhuak a, 2015-ah album ‘Spirit on a Mission’ an tichhuak leh bawk.
Scorpions bassist \hin Francis Buchholz a thi
