Site icon The Aizawl Post

Scotland an buai zual zel

Hmasawn duh vanga head coach thar nei Scotland chu hmasawn a hnekin an buai zual zel a, head coach Sebastien Pocognoli leh captain Andy Robertson te ngaihdan pawh a inang lo ta hle. Switzerland in 4-0 ngawta an sawp vangin Scotland League B, Group 1-ah pathumna an ni.
Kybunpark-a lenglut Scotland hian chak ngei tumin tan khawh nasa viau mahse an vanduai. Minute 22-naah Lewis Ferguson chuan an lamah a ti-goal a, mualneitu Switzerland hmahruaina goal a thunsak. Own goal hmanga goal an neih bakah hi mualneitu Switzerland in chawlhlawk hmain goal dang an neih belh thei lova, Scotland pawhin an si phurh sut tum viau mahse an hlawhtling thei bik lo.
Chawlhlawk hmain goal khat chauh lut bawk mahse chawlhlawk hnu lamah goal thum ngawt a luh belh a, inkhel a hmuhnawm leh zual. Mualneitu Switzerland in second-half-ah bul an tan tha viau a, minute 47-na lekah Winsley Boteli chuan an goal hnihna a thun a, an hmahruaina a tizau leh zual.
Si hnih faia hma an hruai hnuin Switzerland in inrintawkna sang zawk nen an mikhualte an hmachhawn. Scotland talbuai zual lai chuhin an nawr chiam a, Alvyn Sanches chuan minute 51-na lekah an goal thumna a thun belh zui leh cheu. Hun rei tak chhung 3-0 a hma an hruai hnuin hun tawp dawn hnaih minute 89-naah Switzerland tan Zeki Amdouni chuan an goal lina thunin an chakna a nemnghet. Hun puma goal an thun theih loh vangin chak mamawh Scotland chu Switzerland lakah an tlawmin an mualpho zui leh ta a ni.
Switzerland lakah an tlawm leh tak vangin Scotland player thenkhat leh an football thuneitute chuan an head coach Sebastien Pocognoli duhkhawp lohna lian tak an nei tawh. Poconogli hian hmasawna chetha tur chuan a laka dawhtheihna an neih a ngaih thu a sawi. An coach thusawi hi Scotland captain Andy Robertson chuan a pawmpui lo thung a, “Dawh thei turin hun kan nei tawh lo,” a ti ve hmak thung.
Scotland hian August thla khan Steve Clarke thlakin Poconogli hi an head coach thar atan an ruat. Coach thar hnuaiah hmasawn beiseina lian tak nei bawk mahse vawi ruk an khelh atangin vawi hnih chiah hnehna an chang. An result a chhe viau zel a, Nations League a League B lamah pathumna an ni zui leh ta zel bawk nen an buai zual ta zel a ni. Scotland hnehtu Switzerland hi group champion an ni.

Exit mobile version