Scouts & Guides 149-in award dawng
Mizoram Bharat Scouts & Guides (MBS&G) chuan StateAward a pek theih sang ber, Rajya Puraskar Award/ Governor’s Award dawng tura thlante hnenah Thawhlehni khan Rajya Puraskar Award a hlan.
Raj Bhavan-a award sem hmanpuitu larsap Gen. Vijay Kumar Singh (Retd) chuan, ram pum huap Scouts & Guides chawimawina sang ber – Rastrapati Puraskar dawng thei tura theihtawp chhuah turin a fuih a. Mizote theihna, khawtlang inenkawlna leh nunphung thlirin Rastrapati Puraskar dawng thei tur tam tak an awm ngei a beisei tih a sawi. Rajya Puraskar dawn chu Scouts & Guides nuna hlawhtlinna ngaihhlutawm tak a ni, tiin, “Hei hian inpekna, beih hram hramna, rawngbawlna leh than zel duhna a entir a ni,” a ti.
Rajya Puraskar Award dawng thei tur hian Tritiya Sopan Level chin tal thlen a ngai a. Scouting/ guiding skill lama thiamna tha tawk tak nei, vantlang rawngbawlna leh hmasawnna kaihhnawih hmalaknaa tel tawh bakah Rajya Puraskar Scouts & Guides Testing Camp paltlang tawh an nih a ngai. 2024 batch atangin Mizoram pumah Scouts & Guides 149 (Scouts 64, Guides 85) in he award hi an dawng.
District tina Rajya Puraskar dawn dan chu – Aizawl district – 100 (Scouts 42, Guides 58), Lunglei district – 16 (Scouts 8, Guides 8), Champhai district – 15 (Scouts 8, Guides 7), Mamit district – 10 (Scouts 2, Guides 8), Saitual district – 8 (Scouts 4, Guides 4) an ni.
Scouts & Guides 149-in award dawng
