Ruah a sur nasat takin tih thu-ah sorkarin sikul chawlh a puang a, mahse sikul naupang engemaw zat chu sikul an thleng hman.
Khawchin hrilhlawkna behchhana chawlh hi puan a nih chuan a hma ni-ah khan a tuk atan a puan theih tawh a, mahse sikul kal tura chhuah hun tawhah sorkar hian chawlh a puang chauh!
Sikul naupang engemaw zatin sikul an thleng hman a, nu leh pa engemaw zatin an fate sikulah an hruai hman. Nu leh pa engemaw zatin sikul atangin an hawsan hman a, hruai tura thawh chhuah that leh a ngai. Hemi chungchangah mak ti leh phun an tam a, social media lamah pawh phun thawm a ring.
“Khatiang khawpa tlai leh chawpchilha chawlh an puang kha a mak a, min tibuai vek alawm,” nu pakhat chuan a ti a, “Sorkarin chawlh a puang tlai a, keini’n kan hre tlai bawk a, tlai khawhnuah sikul atangin kan inhruai leh a,” pa pakhat chuan a ti.
Mizoram sorkar hian IMD (India Meteorological Department) atangin khawchin hrilhlawkna a dawng thin a, chumi mil chuan sorkarin a tul chuan chawlh a puang thin. Thlipui a tleh dawn tih a nih avanga chawlh puan, vanneihthlak taka a tleh leh tak loh avanga nuihza siam nana hmang te pawh an awm thin! Chawlh puang kher lovin sorkarin ruah leh thlipui vanga ralkhel dar a vuak chang a awm a, inralring tura mipuite hriattirna a chhuah thin. Thlipui a tleh dawn tih a nih avanga sorkarin fimkhur tura mipui a ngen avanga mahni in chung kilh tha lai thlalak te pawh hmuh tur a lo awm tawh thin. Kuminah erawh sorkarin se bo hnuah se kawng a khar thin a ni ber.
Remal cyclone leh a ruah ken a rawn thawk dawn tih hrilhlawk a nih khan, a ni khatna May ni 27-ah ruah nasa tak a sur a, kha kha IMD-in a hmain Mizoram sorkar a hriattir lawk. Chawlh puan emaw a awm lo a, a tuk May ni 28-ah sorkar hnathawk engemaw zat mahni thawhna hmun an thlen hnuah chawlh a puang leh hnuhnawh. Hemi tum pawh hian zing karah emaw, a hman ni-ah emaw puang lovin tlai takah chawlh a puang a, sorkar hnathawk thenkhat chuan “|an huna thleng hman lo thinte an vannei a, tan hun ngai pawimawhte kan buai thlawn thung a,” tiin fiamthu ti takin an sawi nghe nghe. July ni 1 leh ni 2-ah ruah tam tak a sur dawn tih hrilhlawkna pawh IMD atangin sorkarin a dawng reng a, ni 1-ah khan State Meteorological Centre-in an chhinchhiah dan chuan ruah hi mm 84.2 lai mai a sur nghe nghe, mahse chawlh puan emaw a awm lo. A tukah sikul kal hun tawhah chawlh a puang leh hnuhnawh a, chu pawh chu Mizoram sorkar hnuaia information & public relations department hmanga puan a ni lo; mipuiin social media atangin an hre chauh.
May ni 27 velah Remal thlipui leh ruah a thawk dawn tih hrilhlawk a nih khan sorkar lamah chawlh puan emaw inhmakhua emaw a awm lo a, khami tuma leimin tuartu Hlimen-a chhungkaw engemaw zatte tana relief camp sakna tur sum pawh thla khat liam hnuah pawh a la pe chhuak lo. Khawtlangin a bain camp hi an sa ringawt!
Se bo hnu-ah se kawng khar
