Season tawpa chhuah tum Mbappe

Season tawpa chhuah tum Mbappe
France striker tha mi Kylian Mbappe chuan tun season kal lai tawp ruala club chhuahsan a duh thu Paris St-Germain a hriattir ta.
Kum 25 mi Mbappe leh Ligue 1 champion inkara contract ziah hnuhnun ber pawh a tawp ve tawh dawn a, tunhma atanga France international beisei ngar ngartu Real Madrid nen bawk sawizawm leh mek a ni.
Nikum nipui thawt lai pawh khan Mbappe hmalam hun hi a lo nghing luai luai tawh a, a club vawn lai PSG nena an inep boruak kha a lian bawk a, first-team squad atangte khan a kalbo hman hial a, season thar atana Asia khawmualpuia inbuatsaihna an kalpui tum pawhin a tel ve lo hial kha a nih kha.
An inremna ding lai ang chuan pawl pahnih inremnain French forward hian kum khat dang contract pawhsei theih tih ni mah se a chhuak ve dawn ta nge nge niin a lang a, a chhuah dan tur hi la chiang lo mah se transfer fee dawng tura hralh emaw player lamin a sum chan tur thap (financial sacrifice) emaw a ni thei.
PSG hi chuan chhuak lo se an la duh reng tih a hriat theih a, mahse, tuntum chu an chelh zo tawh dawn lo tura ngaih niin, a chhuak a nih chuan Parc des Princes club hian season liamta tawp ruala Argentina forward Lionel Messi leh Brazil international Neymar-te kalbo hnua ‘Galacticos’ kalsan kawng an zawh kha an chhunzawm dawn niin a lang a, squad naupang zawk dinchhuah zel an tum dawn niin a lang.
Kum 2018 World Cup-a France champion-puitu Mbappe hian tun dinhmunah kum khat chhungin euro maktaduai 200 (£171m) tehreng a hlawh pha nia ngaih niin, heti zat hlawh pe thei Ligue 1 giants hi a chhuahsan a nih pawhin a kalna tur club chu sum lama pachhe tak an ni thei dawn lo hrim hrim a, a vanglai la hmang chho chauh tura ngaih a la nih miau avangin khawi team pawh zawm se a hlawh thar tur pawh hi theuneu lo hle tura ngaih a ni.
Mbappe hian tualchhung leh Europe thlengin a club vawn lai tan hian goal a la thun kal zel a, Nilaini zan Champions League last 16 inkhel pakhata sihnih faia French champion-in sihnih faia Real Sociedad an hneh tum pawhin goal hmahruai a khung leh a, season kal lai Europe top competition-a a goal lina chiah niin, domestic league lamah chuan tun season-ah hian goal 20 a tilut tling tawh.
PSG a zawm hnuah inelna hrang hrang game 290 atangin goal 243 leh assist 93 a nei tling tawh a, Ligue 1 title vawinga a lakpui tling tawh bawk.
Kum 2017-a rawlthar kum 17 mi lek ni chunga PSG a zawm hma pawh khan Mbappe hian a club hlui Monaco chu French top-flight title a lo sualchhuahpui tawh a; Paris club-in hmabak nei eng tak a ni tih an hmuh hnuah loan-in an senglut phawt a, a hnuah euro maktaduai 180 (£165.7m)-in an lei nghet zui ta a ni.
Monaco tan khan match 60 khelhah goal 27 thunsak tlingin, assist pawh tum 13 a siamchhuak hman.
French Ligue 1 title na na na chu vawiruk ngawt a hawn tling tawh a, mahse, footballer kei ka ni inti chinin thla an lakpui chawk thin Uefa Champions League trophy ta neih kawngah a la hlawhchham tluang zel a, chutih kawngah chuan PSG vawn reng hi beidawnthlak a ti takzet tawh niin a lang!
2021-22 season tawp rual khan Mbappe hian free transfer-a chhuah a lo tum tawh a, hlawhtling zo loin a contract neih lai a pawtsei ta zawk a, kum hnih daih tur inremna tharah chuan, a tir lama tarlan tak ang khan, pawl pahnih an inrem a nih chuan kum khat dang contract pawhsei leh theih tur tih contract-ah chuan bilh tel a ni nghe nghe.
Thla 12 dang cham zui leh tura contract pawhsei leh erawh Mbappe hian a tum ta lo tih PSG a hriattir tawh a, nikum July thla khan Japan rama an club pre-season tour-ah pawh a tel lo tih tarlan a ni tawh bawk.
PSG-ah a nghet lo tih an hriat rualin oil lipui vanga sum ngah Saudi Pro League club Al-Hilal chuan world-record (£259m) phawrh huamin an lei ngam tih an sawichhuak a, mahse, vanglai taka Arab lama kalbo duh loin Mbappe hian amah hmaichhana hmuh tum Al-Hilal club aiawhte a hmu duh ta lo a ni.
Asia tour-a a tel loh hnu khan chhuak thei ta chuang loin first-team training a zawm leh a, khatih lai khan PSG chuan beiseina sang tak neiin inbiakna beiseiawm an nei tih an tarlang a; Mbappe pawh chuan Real Madrid lama kal tumna thulh felin, tuna a contract neih mek hi May 2022 khan PSG nen an ziak leh ta zawk a ni.
Club lama a hawi lam a tihchian hnuin 2022 World Cup final-ah hat-trick a siam zui a, mahse, penalty petah Argentina an hneh lo a; tournament zawh rualin Hugo Lloris chuan Les Bleus duty a chawlhsan a, Mbappe kutah France captain mawhphurhna a tla a; club lamah erawh PSG a la vuan reng a, Champions League title pawh a la hlawhchhuak ta chuang lo a; a chanchin tharlam ber ni leh ta rih chu season tawp ruala chhuah a duh thu leh Real Madrid nen bawka sawizawm an ni chho leh ta hi a ni.