MLA candidate tur 39 an puan tawhah seat chan loh vanga rilru na tlem azawng awm mah se, tunah chuan harsatna an nei tawh lo tih ZPM president Lalliansawta chuan a sawi.
Thawhtannia an party office-a inkhawmah ZPM president chuan candidate 39 an puang tawh a, hengho zat aia tam fe seat beisei, chang ta lo an awm a; seat chan loh avanga rilru na tlem azawng an awm a, tunah erawh party-in harsatna an nei tawh lo tih a sawi. “Politics hi khuai rau ang deuh a ni a, kalna lam tur pan tur zawnga thlawk, hnunglam hawi zawnga thlawkte an awm bawk a, mahse an liam duak a, an awmna tur lam an pan fel leh vek thin. Mi kal loh dan deuha kalte pawh an thahnemngaih dan a dang a ni mai a, mi tangkai tak an ni fo thin,” a ti.
Mi tam takin candidate-te sum an dil thin a, hei hian inthlan senso a ti hautak em em thin tih Lalliansawta hian a sawi a. Kalphung tharah erawh diltu niloin petu zawk an ni mek, tiin, “A tha zawngin inthlan kalphung a her danglamna ni turah ka ngai a, hetiang hi Mizoram politics-ah thil thar a ni hialin ka hria,” a ti.
Zingah ni a chhuah dawnin a chhuahna lai tur a sen phut a, hai rual a ni ngai lo ang bawkin, khawi hmunah pawh ZPM sawrkar rinna thu chu mi titi ber a ni tih a sawi bawk.
Seat chan loh vanga harsatna kan nei tawh lo – ZPM president
