Remna leh muanna hnuaiah khawtlang ei leh bara intodelh turin theihtawp an chhuah a, SEDP hmangin ram mipui dinhmun chawikan chu MNF sawrkarin a tum a ni tih MNF senior vice president Tawnluia chuan a sawi.
Thawhtannia Khawhai leh Sialhawka MNF Campaign office a hawnnaah Tawnluia chuan MNF tum bulpui ber zinga pakhat chu remna leh muanna tluantling neih a ni, tiin, “Kan thenawm atangte in raltlan an lo awm a, an nunphung a ralmuang lo a. Keini erawh kan remna thuthlung kan vawnghim reng a, state ralmuang ber nih zel kan tum. Kan remna thuthlung hlut zia hi zir nawn fo ang u. Remna leh ralmuanna hnuaiah khawtlang ei leh bara intodelh turin theihtawp kan chhuah a, SEDP hmangin ram mipui dinhmun chawikan hi MNF sawrkar hian kan tum a ni,” a ti.
MNF chu an hming angin hnam hmahruaitu party an ni a, hnam damna, Mizo hnam dinkhawchhuahna chu an tum ber zing ami a ni tih MNF hruaitu hian a sawi. Pu Zoramthanga kaihhruaina hnuaiah, lungrual leh pumkhatin sawrkar a kal a, party an kal a; kalphung nghet nei party an ni a, chu chu Zoram mipuiin an hria a, rintlak leh belhtlakah an dah a, kumin inthlanah pawh hnehna sang tak nen mipuiin sawrkar tir leh ngei an tum, tiin a sawi a ni.
SEDP hmangin ram mipui dinhmun chawikan kan tum – Tawnluia
