SEDP sem nghak a, MNF-a la awm an tam a, SEDP sem zawh hnu ah MNF chhuahsan runpui a thleng dawn tih Congress Legislature Party (CLP) leader Zodintluanga chuan a sawi.
CLP leader hian thuchah tichhuakin, inthlan dawna cheng nuai 3 sem an tumna project SEDP chu chiang takin a hlawhchham tih a sawi a. Tuna chief minister ni ta hian inthlan dawnah cheng nuai 3 aia tlem lo an sem tur thu uar takin a tlangaupui a, mipui pawhin awih sakin, MNF-in sawrkarna a chan phah chhan pawimawh tak pakhat a ni tih a sawi.
Sawrkarna an chan hnu ah inthlan dawna an tlangaupui lo ang hlirin SEDP an kalpui tih sawiin, “Mipui chan ve chin a tlem hle a. Inthlan leh dawn tepah mi 60000 hnenah nuai 3 ni loin, a let engemawzata tlem Rs.50000 an sem ve tawk a ni,” a ti. Congress sawrkar chuan a intiam angin chhungkaw nuai chuang hnenah NLUP cheng nuai 1 an pe tih a sawi.
Chhungkaw 60000 dang hnenah SEDP pek leh an tumnaah pawh 1st leh 2nd phase-a thenin, chu pawh cheng nuai 3 ni loin, Rs. 50000 tho pek a tum tih a sawi a. An sem thei angem tih pawh hriat a nih loh thu leh, an lo sem thei a ni pawhin, inthlan puan a hlat tawh loh avangin 1st phase – Rs. 25000 bak an sem hman dawn lo tih a chian tawh thu a sawi.
“Mi thenkhatin SEDP vangin MNF an la chhuahsan lo mai chauh a, an sem leh hun hunah MNF chhhuahsan runpui a thleng dawn. Chhungkaw tam takin Rs. 25000 dawn an duh a, MNF an nih loh chuan dawn theih a nih loh avangin a hmingin an MNF ve mai mai,” Zodintluanga hian a ti. Nuai 3 tiama Rs. 50000/ 25000 chauh petu MNF chu SEDP dawngtute pawhin vote an tum tawh loh tih a sawi a ni.
NLUP avangin mi tam takin eizawnna ngelnghet an neih phah a, chhungkaw tam takin an dinchhuahpui tih a sawi a. SEDP erawh dinchhuahpui tham leh eizawnna bul tanna tham a nih miau loh avangin hlawhtlinpui an awm loa, a dawngtute erawh an demawm loh tih a sawi.
PAHOSS chungchangah, PAHOSS dawng tura thlan an nih avangin in leh lo tidanglam a, dawn mumal zui leh si loh avanga buai phah an tam tih CLP leader hian a sawi a. PAHOSS dawng tura thlan an nih avangin sum pukchawpa in leh lo tidanglam a, dawng mumal leh thei si lo pawh an awm tih sawiin, “PAHOSS hi a hlawhchham chiang hle,” a ti.
CLP leader tarlan danin, PAHOSS dawng tura thlan zingah mi 11 chiah an sum dawn tur ang dawng kim an la awm a. Sum dawng miah lo pawh a dawng tura thlan zahve aia tam an awm. PAHOSS nodal department UD&PA chuan dilna 1456 an dawng tawh a, tanpuina dawng turin mi 403 thlan an ni tawh. Mi 140 hnenah 1st instalment cheng nuai 890 pek a ni a, mi 47 hnenah 2nd instalment nuai 200.60 pek tawh niin, mi 11 hnenah final instalment nuai 34.20 pek tawh a ni. Tanpuina dawng tura thlan zingah sum la dawng lo hrim hrim 205 an awm.
SEDP sem hnuah MNF chhuahsan runpui thleng dawn – CLP leader
