Sawrkar laipuiin India rama minority communities dawmkanna tur programme a duan PMJVK (Pradhan Mantri Jan Vikas Karyakram) hnuaiah Mizoramin hmasawnna hna thawhna tur sum tam tak a dawng thin a. Heng sumte hi a hmanna tur ni lovah hman a nih avangin, tun tum budget session-ah hian nasa taka auchhuahpui a ni a. Mizo pa thufing – “Sem sem, dam dam…” tih chuan Mizoram mipui tana hmasawnna hna thawhna kawngah hmun a chang thuk lo hle, a tih theih awm e.
PMJVK hi a tirah chuan Multi-sectoral Development Programme (MsDP) tih thin kha niin kum 2008 atanga hman tan a ni a, he scheme hian 31.3.2018 thleng kha awhin a hnu lamah PMJVK tia thlak a ni ta a; Minority Concentration Areas tih a ni. Tunah hian 15th FC hnuaiah chhunzawm zel niin 2026 thleng kalpui a ni leh dawn a.
He scheme guidelines ang hi chuan – education, health leh skill development bik atan 80% hman ngei tur a ni a; heta tanga a zatve (33-40%) hi hmeichhiate dawmkanna tur infrastructure bik atan hman tur a ni, tih a ni nghe nghe. Hei hi Mizoram hian kan lo zawm lo hle tih tun tum budget session-ah hian a lo lang chhuak ta a ni.
Session kal mekah Group Leader Pu Lalduhoma’n a tarlan danin, PMJVK atanga sum hmuhte hi sports infrastructure din nan kum 2018-19 chhung khan 100% hman a ni a; 2019-20-ah 80%, 2020-21-ah 100% tih a ni. Kum 2019-20 chhunga 20% hian ngaih pawimawh bik department pathumte hi a cover chiah ta em tihte pawh zawhna awm thei a ni ta!
Sports lama hmasawnna neih hi a tha a, hma kan lo sawn a nih pawhin a lawmawm em em; mahse, thil danga hmasawnna hna thawhna tur sum lo hup barh ngai khawpa sports hi dawmkan ngai niin a lang hran lo. Guidelines pawh hian education, health leh skill te hi an pawimawh hmasa a tih vangin a dah lal a, chu chu kan mamawh dan pawh a ni. Sports infrastructure ropui tak tak nei si in, a hmang tangkaitu turte hi zirna, hriselna leh skill lamah hniam hle si se, awmzia a nei dawn lo tihna a ni.
Mithiamten balance diet an hmuhchhuahah chuan, tui tihzawng pakhat chauh ei nghek hi taksain a tuar, an ti a. Taksa ngeih tawka in-balance tura eitur bituk thin a nih ang hian, hmasawnna hna thawhnaah pawh hian a in-balance tawk tura “Sem sem…dam dam..” nena kalpui a pawimawh hle tih a lang chiang zel ta a ni ber e.
Sem sem… dam dam …
![](https://theaizawlpost.org/wp-content/uploads/tap_logo-min-large.jpg)