Nilai zan khan Wimbledon quarter-final khelh zawh a ni a, Semi-final a intum turin Novak Djokovic leh Jannik Sinner ten hnehna an chang.
Grand Slam ah vawi 24 champion tawh a, vawi 25 champion hmasa ber nih tuma tan khawh mek Djokovic hian 22nd Seed Flavio Cobolli a hmachhawn. Amah ngaisang em emtu Cobolli lakah bul a ṭan ṭha lova, mak tak maiin set hloh hmasa zawkah a ṭang. Set khatnaah break an neih theih loh ve ve vangin tie-break khelh a ni a, tie-break ah Cobolli chungnung zawkin, set la hmasa zawkah a ṭang.
Set hloh hmasa mah se last 16 ang thovin Djokovic a ropui zui leh a, hmuhnawm takin a inlan. Nole hian set hnihnaah break a nei zawn a, game hnih chiah hlohin set a la let. 1-1 a nih hnuin inkhel a hmuhnawm zui viau a, an inhnehtawk chho hle. Set thumnaah tie-break an khel leh hman a, tie break khelh ngai lo turin Djokovic a che fuh hlauh a, break pawimawh tak a nei set thumna leh set linaah break pawimawh tak a neih chhawr ṭangkaiin set hnih a la zawn zui leh a, Flavio Cabolli lakah hian 6-7 (6-8) 6-2 7-5 6-4 a hnehna changin semi-final a lut.
Quarter-final hnuhnung berah champion tura rinkai ber Jannik Sinner chuan set hloh lovin Ben Shelton a hneh.
Last 16 ah hliam tenau nei Sinner hi service na tak Ben Shelton lakah bul a ṭan ṭha bik lutuk lova, break a nei thei bik lo. Inkhel hmuhnawm takah hian tie-break khelh a ngai nghal a, tie-break ah Sinner a chungnung nghal a, set la hmasa zawkah a ṭang.
Harsa taka set a lak hnuin Sinner a khel ṭha chhunzawm a, set hnihna leh set thumnaah vawi khat ve ve break a nei a. Game li hloh chungin set a la zawn a, Shelton lakah hian 7-6 (7-2) 6-4 6-4 a hnehna changin semi-final a lut.
Semi-final ah Djokovic leh Sinner te inkhel turin ngaihven a hlawh hle. Tennis player ropui ber Djokovic hian amah aia kum 15 zeta naupang zawk leh vanglai hmang mek Sinner hi tunhnaiah a ngam lo tlat ṭhin a, vawi 9 an inhmachhawn tawhah 4-5 in hnufual zawkah a ṭang mek. Grass Court ah vawi hnih intum tawhin Djokovic a chak ve ve thung. Wimbledon ah chungnung zawk a nih ṭhin vangin Nole hian Sinner hneh theih beiseina sang tak a nei ngei dawn. Hetihlai hian Sinner hian Grass Court-a ala hneh ngai loh Djokovic lakah hnehna chan tumin thapui a thawh ngei dawn a, semi-final a an intum tur hi inkhel hmuhnawm tak a nih ngei a beiseiawm.
